Թուրքիայի խորհրդարանը վերսկսել է ՆԱՏՕ-ին անդամակցելու Շվեդիայի հայտի քննարկումը

Թուրքիայի խորհրդարանի արտաքին հարաբերությունների հանձնաժողովը երեքշաբթի օրը վերսկսել է ՆԱՏՕ-ին անդամակցելու Շվեդիայի հայտի շուրջ քննարկումները՝ օրեր անց այն բանից հետո, երբ Թուրքիայի նախագահ Ռեջեփ Թայիփ Էրդողանը սկանդինավյան երկրի ընդունումը կապեց ԱՄՆ-ի կողմից F-16 կործանիչներ գնելու Թուրքիայի խնդրանքի հաստատման հետ, հաղորդում է AP-ն:

ՆԱՏՕ-ի անդամ Թուրքիան հուլիսին հանել է Շվեդիայի՝ անդրատլանտյան դաշինքին անդամակցելու վերաբերյալ առարկությունները, սակայն այդ ժամանակվանից վավերացման գործընթացը կանգ է առել խորհրդարանում: Թուրքիան մեղադրում է Շվեդիային այն բանում, որ նա բավականաչափ լուրջ չի վերաբերվում իր անվտանգության խնդիրներին, այդ թվում՝ քուրդ զինյալների եւ այլ խմբավորումների դեմ պայքարին, որոնց Անկարան անվտանգության սպառնալիք է համարում:

Այս ամիս Էրդողանը ևս մեկ խոչընդոտ ստեղծեց՝ բացահայտ հայտարարելով, որ Թուրքիան կվավերացնի ՆԱՏՕ-ին անդամակցելու Շվեդիայի հայտը միայն այն դեպքում, եթե ԱՄՆ Կոնգրեսը հաստատի Անկարայի խնդրանքը՝ 40 նոր F-16 կործանիչներ և առկա նավատորմի արդիականացման հավաքածուներ գնելու վերաբերյալ: Թուրքիայի առաջնորդը նաեւ կոչ է արել երկու օրենսդիր մարմիններին գործել «միաժամանակ» եւ հայտարարել Է, որ Կանադան եւ ՆԱՏՕ-ի մյուս դաշնակիցները պետք է հանեն զենքի մատակարարման էմբարգոն, որը սահմանվել է Թուրքիայի վրա: