Ինչ պետք է իմանան ռուսները Հայաստան ճանապարհորդելու մասին
ՎԵՐԼՈՒԾՈՒԹՅՈՒՆՆԵՐ
Csn-tv.ru-ն գրում է, որ ռուսները հնարավորություն ունեն ամանորյա տոներն անցկացնել Հայաստանում, և շատ տուրօպերատորներ արդեն տրամադրել են ATOR-ին տեղեկատվություն էքսկուրսիոն տուրերի և ավիատոմսերի արժեքների մասին, ինչպես նաև խորհուրդներ են տվել, թե ինչ արժույթ է ավելի լավ ունենալ իրենց հետ և որտեղ են ընդունվում «Միր» քարտերը Հայաստանում:
Տուրօպերատորների մեծամասնությունն Ամանորին դեպի Հայաստան տուրերի պահանջարկը գնահատում են նախորդ տարվա համեմատ կայուն, միաժամանակ նշելով անկախ ճանապարհորդների թվի աճ, ինչպես բացատրել են BSI Group-ի և Space Travel-ի փորձագետները։
Space Travel-ի փորձագետներն ընդգծել են, որ տրանսպորտային ծառայությունների առատությունը, հյուրանոցների ամրագրման հեշտությունը և լեզվական ու արժույթային խոչընդոտների բացակայությունը Հայաստանը դարձնում են հարմար վայր անկախ ճանապարհորդությունների համար, ինչը նաև հանգեցնում է զբոսաշրջությունից տուրօպերատորների մասնաբաժնի ընդհանուր հոսքի նվազմանը։
Coral Travel զբոսաշրջային օպերատորի ներքին շուկայի տնօրեն Ալենա Գրոմովան ավելացրել է, որ արժույթի տատանումներն ազդում են հարևան երկրների, այդ թվում Հայաստանի և Վրաստանի պահանջարկի վրա, և այդ պատճառով նրանք չեն տեսնում Ամանորյա ամրագրումների առանձնակի աճ։ Նա նշել է, որ ամրագրումները մնում են նախորդ տարվա մակարդակին։
Ազգային տուրօպերատոր ALEAN-ի մասնագետներն էլ նշել են, որ դեպի Հայաստան տուրերի գների 15 %-ով բարձրացումը նույնպես ազդել է վաճառքի վրա՝ հաշվի առնելով ռուբլու ներկայիս փոխարժեքը։ Anex-ի փորձագետները կարծում են, որ Հայաստանը զբոսաշրջային շուկայում չի մեծացրել իր ժողովրդականությունն անցյալ տարվա համեմատ արտագնա ուղղությունների տեսականու չընդլայնման և այն բանի պատճառով, որ երկիրը երբեք չի եղել հետաքրքիր ուղղություն տուրօպերատորների համար, չնայած կա մուտքի հեշտություն, բայց չկա լողափային զբոսաշրջություն:
Ինչպես հիշեցրել են Russian Express-ի փորձագետները, ՌԴ քաղաքացիներին Հայաստան մուտք գործելու համար անհրաժեշտ է միայն Ռուսաստանի Դաշնության ներքին անձնագիր։ Շուկայի մասնակիցները նշում են, որ հայաստանյան ուղղությամբ վաճառքի հիմնական մասնաբաժինը բաժին է ընկնում հյուրանոցներին և «հյուրանոց + թռիչք» համակցումներին։ PAC Group-ը հավելել է, որ շատ զբոսաշրջիկներ իրենց հանգիստը լրացնում են արդեն տեղում էքսկուրսիաների միջոցով:
ICS Travel Group-ը նշել է Երևանի հյուրանոցների մեծ պահանջարկը, հատկապես կենտրոնին ավելի մոտ գտնվող 3-4 աստղանի հյուրանոցների համար, որտեղ սովորաբար մնում են 5-7 գիշեր: FUN&SUN-ը հիշեցրել է, որ որքան մոտենում է Ամանորը, այնքան մեծանում է ավիատոմսերի թանկացման հավանականությունը, իսկ Մոսկվայից և մարզերից դեպի Երևան թռիչքների ուղեվարձն այլևս չի կարելի համարել մատչելի։
Գրոմովան կարծում է, որ օդային ճանապարհորդության թանկության պատճառով Հայաստանը դժվար թե դառնա «վերջին րոպեի» ուղղություն: Միջին հաշվով, 5-օրյա էքսկուրսիոն շրջագայությունը 3 աստղանի հյուրանոցում տեղավորմամբ երկուսի համար կարժենա 60–80 հազար ռուբլի, իսկ 4 աստղանի հյուրանոցում՝ 75–110 հազար ռուբլի երկուսի համար գումարած ավիատոմսերի արժեքը։
Տուրօպերատորները խոսել են նաև Հայաստան մեկնելու արժույթի մասին։ Մարդիկ կարող են իրենց հետ վերցնել դոլար, եվրո կամ ռուսական ռուբլի։ Space Travel-ը պարզաբանել է, որ ռուբլին ընդունվում է փոխանակման կետերում և որոշ մանրածախ կետերում։ Սակայն Հայաստանում «Միր» քարտերի ընդունման հետ կապված իրավիճակը միանշանակ չէ. FUN&SUN-ը նշել է, որ Հայաստանում ոչ բոլոր բանկերն են գործարքներ իրականացնում այդ քարտերով, հատկապես փոքր քաղաքներում կամ ավաններում: Նաև պատժամիջոցների տակ ռուսական բանկերի կողմից թողարկված «Միր» քարտերը սպասարկվում են միայն ՎՏԲ-ի հայաստանյան մասնաճյուղերում։ Մասնագետները խորհուրդ են տալիս վերցնել կանխիկ գումարի պաշար՝ ցանկալի է դոլարով կամ ռուբլով, և անմիջապես տեղում ստուգել «Միր» քարտով վճարելու հնարավորությունը։
Նյութը հրապարակման պատրաստեց Կամո Խաչիկյանը
