Կարծիք. Հայաստանի տեղը Ռուսաստանի գլխավորած Արևմուտքի դեմ պայքարի շարքերում է
ՎԵՐԼՈՒԾՈՒԹՅՈՒՆՆԵՐ
Rossaprimavera.ru-ն գրում է, որ Հայաստանը կարող է ապագա ունենալ և զարգանալ միայն այն դեպքում, եթե միանա Ռուսաստանի գլխավորած ազգային-ազատագրական պայքարին, Մոսկվայում դեկտեմբերի 15-ին տեղի ունեցած «Ռուսաստան-Հայաստան» առաջին հանրային ֆորումի ժամանակ ասել է «Լույս» հայկական տեղեկատվական-վերլուծական կենտրոնի ղեկավար Հայկ Այվազյանը։
«Հայաստանի այսօրվա քաղաքական շրջանակները բազմաբևեռ աշխարհի ձևավորման պայմաններում ի վիճակի չեն քաղաքական, գաղափարական, տնտեսական, քաղաքակրթական ուղենիշներ տալ Հայաստանի ապագա գոյության համար»,- ասել է Այվազյանը։
Նա ընդգծել է, որ Հայաստանում քաղաքական շրջանակների ներկայացուցիչների մեծ մասը, այս կամ այն չափով, գործիքներ են Արևմուտքի ձեռքում, որն օգտագործում է նրանց Հայաստանը գաղութային կախվածության մեջ պահելու համար։ Բացի այդ, Արևմուտքն օգտագործում է Հայաստանը Ռուսաստանի դեմ պայքարում, հավելել է փորձագետը։
«Հայաստանը հաստատ ապագա չունի որպես թալանված, ավերված Արևմուտքի գաղութ, որի ազգային ինքնությունը ոչնչացվում է, այսպես կոչված, արևմտյան ժողովրդավարության իշխանության ներքո»,- ընդգծել է վերլուծաբանը։
Նրա խոսքով, Հայաստանը չի կարող գոյատևել ո՛չ ֆիզիկապես, ո՛չ էլ ազգային ինքնության պահպանման առումով առանց աշխարհաքաղաքական, տնտեսական, գաղափարական, քաղաքակրթական հստակ և միանշանակ ուղենիշների։ «Միգուցե կան երկրներ, որոնք կարող են այդպես ապրել, բայց Հայաստանը, որն աշխարհում առաջինն է ընդունել քրիստոնեությունը որպես պետական կրոն, չի կարող»,- նշել է փորձագետը։
Ըստ նրա, հաշվի առնելով Հայաստանի աշխարհագրական դիրքը, «արևմտյան ժողովրդավարության» գաղափարախոսության տիրապետության ներքո ազգային իրավունքի նկատմամբ անգլո-սաքսոնական իրավունքի գերակայության պայմաններում հանրապետությունը բոլոր ոլորտներում արագ տեմպերով կմարի։
«Ժողովրդագրական, սոցիալ-տնտեսական, մշակութային, գաղափարական, պատմական, հոգևոր և բարոյական բնույթի կործանարար գործընթացները կդառնան սպառնալից, իսկ ինչ-որ պահի նույնիսկ անշրջելի»,- ասել է Այվազյանը։
Նա մատնանշել է, որ մարդու իրավունքների արևմտյան ինստիտուտները Միացյալ Նահանգների և նրա դաշնակիցների համար դարձել են այլ երկրների ներքին գործերին կոպտորեն միջամտելու գործիքներ: Այդ գործիքի օգնությամբ Արևմուտքը խարխլում է այդ երկրների ժողովուրդների ինքնիշխանությունը և հոգևոր ու բարոյական արժեքային համակարգը։
«Արևմտյան «ժողովրդավարության» մոդելը, ըստ էության, նացիզմի ժամանակակից է դրսևորում և մեծ տառապանք է պատճառում աշխարհի մարդկանց հանուն բացառիկ փոքրամասնության իշխանության պահպանման»,- ընդգծել է հայ վերլուծաբանը։
Նա հիշեցրել է, որ ՌԴ նախագահ Վլադիմիր Պուտինն ասել է, որ «Ռուսաստանի պայքարը հանուն ինքնիշխանության, հանուն արդարության ազգային-ազատագրական բնույթ է կրում»։ Փորձագետը հաստատել է, որ Ռուսաստանը պայքարում է ոչ միայն իր, այլ նաև ողջ աշխարհի ազատության համար։ «Հայաստանի տեղը Ռուսաստանի գլխավորած ազգային-ազատագրական պայքարի շարքերում է»,- ընդգծել է Այվազյանը։
Հայաստանը կկարողանա ապագա ունենալ և զարգանալ, եթե նպաստի այդ ազգային-ազատագրական գործընթացին, ավելի արդար, ինքնիշխան, անվտանգ և կայուն աշխարհի ստեղծման գործընթացին, հավելել է հայ վերլուծաբանը։
Նյութը հրապարակման պատրաստեց Կամո Խաչիկյանը
