«Լոլիկը փչացել է. Հայաստանի և Ռուսաստանի միջև նոր սկանդալ է հասունանում»
ՎԵՐԼՈՒԾՈՒԹՅՈՒՆՆԵՐ
Iz.ru-ն գրում է, որ «Ռոսսելխոզնադզոր»-ը հայտնել է, որ հայկական գյուղատնտեսական մթերքներում՝ ծաղիկներում, բանջարեղենում, մրգերում, ավելի շատ վնասատուներ են հայտնվել։ Ընդհանուր առմամբ, այս տարի տեսուչները հայտնաբերել են 72 խախտում, ընդ որում նոյեմբերի 24-26-ն ընդամենը երեք օրվա ընթացքում 36 խախտում: Միաժամանակ, «Ռոսսելխոզնադզոր»-ն ընդգծել է, որ հայկական գյուղմթերքը հաշվառվել է բոլոր կանոններով, նրանց տրամադրվել են անհրաժեշտ սերտիֆիկատներ։ Իսկ դա նշանակում է, որ Հայաստանի պետական կառույցներն են նվազեցրել վերահսկողությունը, ինչը «վտանգ է ներկայացնում Ռուսաստանի բուսասանիտարական բարեկեցության համար»։ Միաժամանակ, «Ռոսսելխոզնադզոր»-ը պնդում է, որ սահմանին բուսասանիտարական հսկողությունն իրականացվում է նախկինի պես, բեռների ստուգման ու մաքսազերծման կանոնները չեն փոխվել։
Միևնույն ժամանակ հայկական լրատվամիջոցներում տարածվում է այն կարծիքը, որ խնդիրները ծագել են քաղաքական տարաձայնությունների պատճառով։ Նշվում է, որ ռուս տեսուչները վնասատուներ սկսել են հայտնաբերել անմիջապես այն բանից հետո, երբ վարչապետ Նիկոլ Փաշինյանը հրաժարվել է գնալ Մինսկ ՀԱՊԿ գագաթնաժողովին։
Իսկ ի՞նչ են ասում փորձագետները:
ՄԳԻՄՕ-ի Կովկասյան հիմնախնդիրների և տարածաշրջանային անվտանգության կենտրոնի առաջատար գիտաշխատող Նիկոլայ Սիլաևը կարծում է, որ Հայաստանի ղեկավարության քաղաքականությունը կարող է տնտեսական դժվարություններ առաջացնել:
«Ես չէի ուռճացնի ներկայիս սահմանին խցանումների նշանակությունը։ Ինձ թվում է, որ խոսքն իսկապես ինչ-որ տեխնիկական խափանումների մասին է։ Բայց պետք է ուշադրություն դարձնել Հայաստանի ղեկավարության պահվածքին։ Տպավորություն է ստեղծվում, որ Երևանը ձգտում է խզել քաղաքական կապերն ու դաշնակցային հարաբերությունները Ռուսաստանի հետ, բայց միևնույն ժամանակ պահպանել տնտեսական փոխգործակցության բարձր մակարդակը։ Ես չեմ հասկանում, թե ինչպե՞ս է դա հնարավոր»,- ընդգծել է նա։
Կովկասագետ Արթուր Աթաևը նույնպես կարծում է, որ քաղաքական տարաձայնությունները կարող են տնտեսական խնդիրներ առաջացնել։ «Չեմ կարծում, որ սահմանին տիրող իրավիճակը քաղաքականության հետ կապ ունի: Մենք գիտենք, որ Վերին Լարսի տարածքում առատ ձյան տեղումներ են եղել, մեծ հերթեր են գոյացել, և խոսքը չի գնում հայ փոխադրողների նկատմամբ հատուկ հակազդեցության մասին։ Միևնույն ժամանակ մենք տեսնում ենք, որ երկու երկրների հարաբերություններում խնդիրներն աճում են։ Առայժմ Փաշինյանի իշխանությունը խուսափել է կտրուկ շարժումներից, բայց եթե բանը հասնի լուրջ ընդմիջման, ապա Հայաստանի համար հետևանքները ծանր կլինեն։ Երկիրը կարող է ընկղմվել խորը ճգնաժամի մեջ, էներգակիրների դեֆիցիտ կառաջանա, գործազրկությունը կաճի։ Եվ այդ ամենն ուղեկցվելու է քաղաքական տուրբուլենտությամբ ու բողոքի ակցիաներով»,- ենթադրել է փորձագետը։
Նյութը հրապարակման պատրաստեց Կամո Խաչիկյանը
