«Փորձեցի թեքահարթակով բարձրանալ, համարյա մեջքի վրա ընկնում էի. սա համատարած երեւույթ է». Փաշինյան
ՔԱՂԱՔԱԿԱՆՈՒԹՅՈՒՆ
Փաստաթղթերով մեզ մոտ ամեն ինչ կարգին է, որ մենք սահմանել ենք, որ բոլոր շենքերը հարմարեցված եւ մատչելի պետք է լինեն հաշմանդամություն ունեցող անձանց համար, բայց շատ դեպքերում պրակտիկայում հանդիպում ենք պրոբլեմների: Այս մասին, այսօր՝ նոյեմբերի 23-ին, կառավարության նիստում հայտարարեց վարչապետ Նիկոլ Փաշինյանը:
Նա մի դեպք պատմեց՝ նշելով. «Երկու օր առաջ մի շենքում փորձեցի թեքահարթակով բարձրանալ, բայց բարձրանալու ժամանակ համարյա մեջքի վրա ընկնում էի, որովհետեւ էդ թեքահարթակի անկյունն այնքան մեծ էր, որ 4*4 ավտոմեքենայով պետք է բարձրանալ: Սա համատարած երեւույթ է: Փաստաթղթով ընդունում ենք շենքը, մեկը չի ասում՝ հլը սպասի մի հատ օգտագործեմ, տեսնեմ՝ օգտագործելի է, թե ոչ: Թեքահարթակ կա՞, իհարկե, կա, կգրեն, որ կա, բայց ոչ մեկը չի փորձի դա օգտագործել:
Եվ երբ հաշմանդամություն ունեցող մարդը ուզենա բարձրանալ, կպարզվի, որ աստիճաններով ավելի հեշտ էր բարձրանալ, քան այդ նորահայտ թեքահարթակով»:
