Եվրախորհրդարանը համաձայնեցրել է 2024 թ․189,3 միլիարդ եվրոյի ԵՄ բյուջեն

ՔԱՂԱՔԱԿԱՆՈՒԹՅՈՒՆ 22 Նոյեմբեր, 2023 22:30

Եվրախորհրդարանի (ԵԽ) անդամները հավանություն են տվել Եվրամիության բյուջեի նախագծին, որը նախատեսում է հատկացումներ համայնքի գործունեության տարբեր ոլորտների համար՝ 189,3 մլրդ եվրոյի չափով։ Քվեարկությունը տեղի է ունեցել Ստրասբուրգում Եվրախորհրդարանի լիագումար նիստի շրջանակներում և հեռարձակվել է խորհրդարանի կայքում։

Այս գումարը համապատասխանում է Եվրոպական հանձնաժողովի սկզբնական առաջարկություններին: Միևնույն ժամանակ, ինչպես նշում է Եվրախորհրդարանի մամուլի ծառայությունը, նոյեմբերի 11-ին կայացած խորհրդակցությունների ժամանակ մասնակից երկրները նույնիսկ ավելացրել են առաջարկվող գումարը 666 միլիոն եվրոյով։ Ամենամեծ աճը կլինի մարդասիրական օգնության տրամադրման ոլորտում (250 մլն եվրո), ևս 150 մլն եվրո կհատկացվի «Գլոբալ Եվրոպա» ներքին համագործակցության և զարգացման գործիքին, իսկ ամենափոքր աճը կտրամադրվի «ռազմական շարժունակություն» հոդվածով ծախսերին՝ 10 միլիոն եվրո:

«2024 թվականի բյուջեի շուրջ կոնսենսուս ձեռք բերելով՝ Եվրախորհրդարանի պատգամավորներն ակնկալում են, որ մինչև տարեվերջ Խորհրդում համաձայնություն ձեռք կբերվի ԵՄ երկարաժամկետ բյուջեի միջնաժամկետ վերանայման վերաբերյալ։ Սա ճանապարհ կհարթի 2024 թվականի սկզբին զգալի լրացուցիչ հատկացումների համար՝ բյուջետային փոփոխությունների միջոցով, որոնք կառաջարկվեն Եվրոպական հանձնաժողովի կողմից: Բյուջեի պլանավորված ավելացումը նպատակաուղղված է Ուկրաինային միջնաժամկետ աջակցություն ցուցաբերելուն, ճգնաժամերին արձագանքելու ճկունության և կարողությունների ավելացմանը, 2024 թվականին ԵՄ ռազմավարական ինքնավարության ամրապնդմանը և նրա ջանքերի մեծացմանը այնպիսի ոլորտներում, ինչպիսիք են միգրացիան և արտաքին քաղաքականությունը»,- ասվում է կոմյունիկեում։