Ամուսինը խանդի հողի վրա ծեծելով սպանել է կնոջը և դիակը նետել ճամփեզրին

Արարատի և Վայոց Ձորի մարզերի ընդհանուր իրավասության դատարանում Լևոն Արազյանի նախագահությամբ ավարտվել է Արման Սարգսյանի գործի դատական քննությունը:

Վեդի քաղաքի 36-ամյա բնակիչ Արման Սարգսյանին մեղադրանք էր առաջադրվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով: Արման Սարգսյանը կալանքի տակ է 2016 թվականի ապրիլի 15-ից:

Ի սկզբանե այս գործը հարուցվել է այլ մեղադրանքով: Ըստ քրեական գործ հարուցելու որոշման՝ 2016 թվականի ապրիլի 14-ի լույս 15-ի գիշերը, չպարզված ժամին, անհայտ ավտոմեքենայի վարորդը Արարատի մարզի Վեդի-Վանաշեն ավտոճանապարհին վրաերթի է ենթարկել հետիոտն Ռուզան Ջ.-ին, անզգուշությամբ մահ է պատճառել, ապա թողել է պատահարի վայրն ու դիմել է փախուստի:

Սակայն շուտով պարզ է դարձել, որ Ռուզան Ջ.-ն վրաերթի հետևանքով չէ, որ մահացել է: Նրան կյանքից զրկել են դիտավորությամբ:

Կարճ ժամանակ անց արգելանքի տակ է առնվել Ռուզանի հետ փաստական ամուսնական հարաբերությունների մեջ գտնված Արման Սարգսյանը: Ու մեղադրանքն էլ համապատասխանաբար փոփոխվել է…

Ըստ մեղադրանքի՝ 2016 թվականի ապրիլի 14-ին, ժամը 20-ի սահմաններում Արման Սարգսյանը զայրացել է իր հետ փաստական ամուսնական հարաբերությունների մեջ գտնվող Ռուզանի վրա այն պատճառով, որ վերջինս Չարենցավանից տաքսիով ժամանել է Վեդի ու գումար չէր ունեցել՝ տաքսու ուղեվարձը վճարելու համար:

Արմանը ուղեվարձի գումար խնդրելու համար զանգահարել է իր քրոջ ամուսնուն, բայց վերջինս գումար չի ունեցել: Հեռախոսով նրա հետ խոսել է նաև Ռուզանը և խոսելով՝ դուրս է եկել Արմանի վարձակալած բնակարանից:

Արմանը մոտ երկու ժամ սպասել է Ռուզանին, բայց վերջինս չի վերադարձել, նրա հեռախոսն էլ դարձել է անհասանելի:

Արմանը վերջապես ճանապարհել է ուղեվարձի սպասող տաքսու վարորդին, ինքը դուրս է եկել տանից՝ Ռուզանին փնտրելու:

Կեսգիշերն անց՝ 00:40-ի սահմաններում, Արմանը Ռուզանին տեսել է Վեդի քաղաքի Արարատյան փողոցում: Ռուզանը խոսում էր հեռախոսով: Արմանը կասկածել է, որ Ռուզանը դավաճանում է  իրեն: Նա 2-3 կմ հետևել է Ռուզանին:

Գիշերվա ժամը 1-ի սահմաններում Վեդի-Վանաշեն ավտոճանապարհի 2-րդ կիլոմետրի հատվածում, ըստ մեղադրանքի,  Արմանը հասել է Ռուզանին, խանդի հողի վրա նրան սպանելու դիտավորությամբ բռունցքներով ու ոտքերով հարվածներ է հասցրել Ռուզանի մարմնի տարբեր մասերին՝ գանգի, կրծքավանդակի, որովայնի, կոնքի, աջ վերին վերջույթի բութ, համակցված տրավմայի ձևով պատճառել է մարմնական վնասվածքներ: Ճանապարհին անօգնական թողնված Ռուզան Ջ.-ն մահացել է ստացած վնասվածքների արդյունքում առաջացած հեմոռագիկ շոկից:

Դատարանում ամբաստանյալ Արման Սարգսյանն իրեն լիովին մեղավոր է ճանաչել դիտավորյալ սպանության համար: Նա հրաժարվել է ցուցմունքներ տալուց:

Նախաքննության ընթացքում ևս Արման Սարգսյանն իրեն մեղավոր է ճանաչել:

Նա հայտնել է, որ 2014-2016 թվականներին աշխատել է Չարենցավանի «Բջնի» գործարանում: Ծանոթացելէ  Ռուզանի հետ, սկսել են միասին ապրել:

2016 թվականի սկզբին աշխատանքից դուրս է եկել, վերադարձել է Վեդի: Ռուզանի հետ պայմանավորվել է, որ Վեդիում աշխատանք գտնելուց հետո տուն կվարձի, և նա կտեղափոխվի իր մոտ:

Ապրիլին արդեն ինքը տուն է վարձել Վեդիում, աշխատանք է ունեցել: Ռուզանը մի քանի անգամ այցելել է իրեն, գիշերել է իր հետ:

2016 թվականի ապրիլի 14-ին Ռուզանը զանգել ու ասել է, որ գալիս է Վեդի: Ժամը 20-ի սահմաններում նա տաքսիով հասել է իր շենքի բակ: Ինքը դուրս է եկել դիմավորելու, առաջարկել է, որ Ռուզանը վճարի ուղեվարձը: Բայց Ռուզանն ասել է, թե գումար չունի, նա կարծել է, թե ինքն է վճարելու…

Ինքը խիստ բարկացել է Ռուզանի վրա: Հետո Ռուզանի ու տաքսու վարորդի հետ բարձրացել է իր վարձած բնակարան:

Ինքը գումար խնդրելու համար զանգել է իր քրոջ ամուսնուն, բայց նա ասել է, թե գումար չունի, առաջարկել է հեռախոսը փոխանցել տաքսու վարորդին:

Տաքսու վարորդը նրա հետ խոսել ու ասել է, թե գումարն իրեն շտապ պետք է, ապա հեռախոսը փոխանցել է Ռուզանին:

Գումարի հարցով իր քրոջ ամուսնու հետ սկսել է խոսել Ռուզանը: Նա խոսելով դուրս է եկել տանից:

Ինքը տանը մնացած հեռախոսով զանգահարել է Ռուզանին, բայց նա չի պատասխանել կամ անհասանելի է եղել:

Մոտ երկու ժամ սպասել է Ռուզանին: Տեսնելով, որ նա չի գալիս, տաքսու վարորդին ճանապարհել ու դուրս է եկել Ռուզանին փնտրելու:

Որոշ ժամանակ անց նրան նկատել է Վեդիի կենտրոնական փողոցում և կասկածել է, որ նա դավաճանում է իրեն:

Որոշ տարածություն հետևել է նրան:

Վեդի-Վանաշեն ավտոճանապարհին հասել է նրան ու խանդի հողի վրա բռունցքով հարվածել է նրա միջհոնքային հատվածին: Ռուզանը իր հարվածից ծնկի է եկել: Ինքը ձեռքով հարվածել է նրա այտին, նա մեջքի վրա ընկել է գետնին: Ինքը սկսել է ոտքերով հարվածներ հասցնել: Երբ Ռուզանն անշարժացել է, նրա թևատակերից քաշել է շուրջ 30 մետր, թողել է ավտոճանապարհի աջ մասում գտնվող խոտերի վրա ու հեռացել է:

Ռուզանի քրոջ ամուսինը դատարանում հանդես է եկել որպես տուժողի իրավահաջորդ: Նա հայտնել է, թե Ռուզանի մահվան մասին տեղեկացել է սոցիալական ցանցերից: Իր իմանալով՝ Ռուզանն ու Արմանը որոշել էին ամուսնանալ…

Տուժողի իրավահաջորդը ամբաստանյալին քաղհայցի պահանջ չի ներկայացրել:

Ճակատագրական  տաքսու վարորդ Շահեն Մ.-ն հայտնել է, թե իր «Մերսեդես Բենցը» վարել է որպես տաքսի:

2016 թվականի ապրիլի 14-ին, ժամը 18-ի սահմաններում Չարենցավանում իրեն է մոտեցել իր համաքաղաքացի Ռուզանը,  պայմանավորվել են, որ 9 հազար դրամով նրան կտանի Վեդի: Գնացել են ինչ-որ տուն, Ռուզանը ինչ-որ տոպրակներ է վերցրել, մեկնել են Վեդի, հասել են այնտեղ ժամը 21-ի սահմաններում: Ռուզանին դիմավորել է Արման անունով մի տղամարդ:

Պարզվել է՝ Ռուզանը գումար չունի, որ ուղեվարձը վճարի: Արմանը բարկացել է նրա վրա:

Մտել են Արմանի տուն: Արմանը ինչ-որ մեկին է զանգել, ասել է, թե Ռուզանը եկել է, բայց տաքսուն վճարելու գումար չունի: Արմանը հեռախոսը փոխանցել է իրեն: Անծանոթ տղամարդն իրեն առաջարկել է հեռանալ Արմանի տանից՝ խոստանալով հաջորդ օրն անձամբ վճարել ուղեվարձը:  Ինքը չի համաձայնել, ասել է, թե իրեն շտապ գումար է պետք:

Հետո ինքը հեռախոսը փոխանցել է Ռուզանին, վերջինս խոսելով դուրս է եկել տանից ու այլևս չի վերադարձել:

Մոտ երկու ժամ սպասել են Ռուզանին: Նրա հեռախոսը չի պատասխանել կամ անհասանելի է եղել: Արմանն իրեն առաջարկել է Ռուզանի ապրանքներից ինչ-որ բաներ վերցնել ու վերադարձնել դրանք, երբ Ռուզանը կվճարի ուղեվարձը: Ինքը համաձայնել է: Արմանն իրեն տվել է մեկ տուփ թեյի բաժակ ու մեկ հատ գազի բալոն: Ինքը վերադարձել է Չարենցավան:

Հաջորդ օրն իմացել է, որ գիշերն Արմանը սպանել է Ռուզանին…

Ռուզանի դիակը վաղ առավոտյան ճանապարհի աջ կողմում հայտնաբերել էր Ատոմ Կ.-ն, ով հեծանիվով առավոտյան գնում էր իր հողամաս: Նա անմիջապես տեղեկացրել է ոստիկանությանը…

Դատահոգեբուժական փորձաքննության եզրակացությամբ՝ Արմանի մոտ հայտնաբերվել են թեթև աստիճանի մտավոր խնդիրներ, որոնք արտահայտված չէին այն աստիճանի, որ նրան զրկեին իր գործողությունների վտանգավորությունը գիտակցելու, դրանք ղեկավարելու կարողությունից:

Արմանը ճանաչվել է մեղսունակ:

Արման Սարգսյանը ամուսնալուծված է եղել, վերջին շրջանում աշխատել է Վեդիում՝ «Մաքուր երկիր» ՍՊԸ-ում:

Արման Սարգսյանը մեղավոր է ճանաչվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով, և դատապարտվել է 10 տարի ազատազրկման:

Արման Սարգսյանից հօգուտ պետբյուջեի կբռնագանձվի  197 հազար դրամ՝ որպես դատական ծախս: