Ալիևը այլ ճանապարհով է դեպի Նախիջևան գնում. Ադրբեջանը շրջանցում է Հայաստանը Իրանի տարածքով
ՎԵՐԼՈՒԾՈՒԹՅՈՒՆՆԵՐ
Eadaily.com-ը գրում է, որ Ադրբեջանի և Իրանի ներկայացուցիչների համատեղ աշխատանքի արդյունքում համաձայնեցվել է Արաքս գետի հարավային ափի երկայնքով երկաթուղային և ավտոմայրուղու երթուղին: Այդ մասին նոյեմբերի 9-ին Տաշքենդում, որտեղ անցկացվել է Տնտեսական համագործակցության կազմակերպության (ՏՀԿ) գագաթնաժողովը, իրանցի գործընկերոջ՝ Իբրահիմ Ռաիսիի հետ հանդիպման ժամանակ ասել է նախագահ Իլհամ Ալիևը։
Ադրբեջանի ղեկավարը վստահություն է հայտնել, որ այդ նախագիծը կիրականացվի «կարճ ժամանակում և կդառնա Հյուսիս-Հարավ տրանսպորտային միջանցքի ևս մեկ ուղղությունը»։ «Արդյունքում մենք կունենանք երկու երթուղի` մեկը Աստարայով, մյուսը Ագբանդով, և երկու երթուղիներն էլ կծառայեն Իրանի և Ադրբեջանի միջև եղբայրական հարաբերությունների ամրապնդմանը և հասանելի կլինեն այլ երկրներին, մեր հարևաններին և գործընկերներին», – նշել է Ալիևը։
Թեհրանը տեսնում է, որ տրանսպորտային և տարանցիկ իրավիճակը տարածաշրջանում օրեցօր բարելավվում է, իր հերթին ասել է նախագահ Ռաիսիին ընդգծելով, որ այդ ոլորտում երկու երկրների շահերը փոխադարձաբար երաշխավորում են Ադրբեջանի, Իրանի և Նախիջևանի միջև տրանսպորտային կապը և միաժամանակ «վերացնում առկա մտահոգությունները»։
Զրույցի ընթացքում քննարկվել են նաև էներգետիկ ոլորտում համագործակցության հարցեր, նշվել է տարածաշրջանային «3+3» ձևաչափի (Իրան, Ռուսաստան, Թուրքիա+Ադրբեջան, Հայաստան, Վրաստան) կարևորությունը։
Ըստ երևույթին, «առկա մտահոգություններ» ասելով Իրանի կառավարության ղեկավարը (Իսլամական Հանրապետությունում նախագահի և վարչապետի պաշտոնները համակցված են) նկատի ուներ Հայաստանի ղեկավարության կողմից նախկինում բազմիցս արտահայտված մտահոգությունն Ադրբեջանի արևմտյան շրջաններից մինչև Նախիջևան՝ Հայաստանի տարածքով արտատարածքային միջանցք կառուցելու Բաքվի ծրագրերի վերաբերյալ։ Ի պատասխան Բաքվի և Անկարայի «Զանգեզուրի միջանցքի» բացման անհրաժեշտության մասին բազմաթիվ հայտարարություններին Երևանը միշտ ընդգծել է, որ Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի եռակողմ հայտարարությունը վերաբերում է միայն մեկ միջանցքի՝ Լաչինի միջանցքին, և նաև մատնանշել հայկական կողմի համար 2020 թվականի աշնանը Ղարաբաղում 44-օրյա պատերազմից հետո տարածաշրջանում տրանսպորտային հաղորդակցությունների բացման «միջանցքային տրամաբանության» անընդունելիությունը։
Երևանն Ադրբեջանի կողմից այդ նախագծի՝ «Զանգեզուրի միջանցքի» նշանակումը դիտարկում է որպես Հայաստանի նկատմամբ տարածքային պահանջատիրության նշան։ Մինչդեռ Բաքվի պաշտոնյաներն ավելի վաղ հասկացրել էին, որ Զանգեզուրի միջանցքը կորցրել է իր գրավչությունն Ադրբեջանի համար, և նա կարող է Իրանի հետ համատեղ իրականացնել Նախիջևանի տրանսպորտային նախագիծը։
Նյութը հրապարակման պատրաստեց Կամո Խաչիկյանը
