Սաուդյան Արաբիայում 45 տարում առաջին անգամ կայացել է Իրանի և Եգիպտոսի նախագահների հանդիպումը
ՔԱՂԱՔԱԿԱՆՈՒԹՅՈՒՆ
Իրանի և Եգիպտոսի նախագահները շաբաթ օրը Սաուդյան Արաբիայի մայրաքաղաքում հանդիպում են ունեցել, որն իր տեսակի մեջ առաջինն է՝ վերջին 45 տարում, հաղորդում է Mehr-ը:
Էբրահիմ Ռաիսիի և Աբդել Ֆաթթահ Էլ-Սիսիի հանդիպումը վերջին 45 տարում երկու երկրների նախագահների առաջին հանդիպումն էր՝ 1979 թվականին Իրանում տեղի ունեցած իսլամական հեղափոխությունից հետո:
Հանդիպմանը Ռաիսին ընդգծել է «Իսլամական երկրների միասնության անհրաժեշտությունը՝ Գազայում իսրայելական ռեժիմի ագրեսիայի ֆոնին»։
«Իրանի Իսլամական Հանրապետությունը որևէ խոչընդոտ չունի բարեկամ երկրի՝ Եգիպտոսի հետ հարաբերությունների ընդլայնման համար»,- ասել է նա։
Իրանի նախագահը Գազայի իրադարձությունների վերաբերյալ Կահիրեում կայացած խաղաղության վերջին հանդիպումը գնահատել է որպես դրական նախաձեռնություն, որի ավարտին խանգարեցին արևմտյան երկրները։
«Կահիրեում կայացած խաղաղության հանդիպումը կարող էր շրջադարձային լինել Գազայում անպաշտպան և անմեղ կանանց ու երեխաների սպանության՝ սիոնիստական հանցագործություններին վերջ տալու համար, սակայն արևմտյան երկրները, որոնք աջակցում են սիոնիստական ռեժիմին, ճիշտ այնպես, ինչպես կանխեցին Անվտանգության խորհրդին և այլ միջազգային կազմակերպություններին այս հանցագործությունները դադարեցնելու համար արդյունավետ գործողություններ ձեռնարկել, նրանք խանգարեցին նաև արդյունավետ հանդիպմանը»,- ասել է Ռաիսին:
Նշելով, որ աշխարհն ակնկալում է, որ Ռաֆահի անցակետը կբացվի, որպեսզի միջազգային օգնությունը կարողանա Գազա հասնել, Իրանի նախագահն ասել է. «Բոլորին պարզ է, որ Ամերիկան և սիոնիստական ռեժիմը խոչընդոտում են Ռաֆահի անցման բացումը՝ Գազայի ճնշված և անպաշտպան ժողովրդին օգնություն ցուցաբերելու համար։ Սակայն այդ խոչընդոտները պետք է հաղթահարել»։
Իր հերթին, Էլ-Սիսին հանդիպման ժամանակ ասել է, որ «մեր հստակ քաղաքական կամքն Իրանի հետ իրական հարաբերություններ հաստատելն է»՝ հավելելով, որ «դրա համար մենք համապատասխան նախարարներ ենք նշանակել՝ երկու երկրների միջև խորը հարաբերություններ զարգացնելու համար»։
«Ինչ վերաբերում է Պաղեստինին, ապա Եգիպտոսն այն երկիրն է, որն ամենաշատն է տուժել այս խնդրի հետևանքներից»,- հավելել է նա։
