Իրանի նախագահը մահմեդական երկրներին կոչ է արել բոյկոտել իսրայելական ապրանքները և զենք մատակարարել Գազա
ՄԻՋԱԶԳԱՅԻՆ
Իրանի նախագահ Էբրահիմ Ռաիսին շաբաթ օրն Էր-Ռիադում արաբա-իսլամական գագաթնաժողովի ժամանակ ելույթ է ունեցել՝ բոլոր իսլամական երկրներին կոչ անելով ցույց տալ միասնության պահ, քանի որ Գազայի հատվածը հարձակման է ենթարկվում, գրում է Mehr-ը:
Շաբաթ օրը Սաուդյան Արաբիայում արաբական և իսլամական պետությունների հանդիպման ժամանակ իր ելույթի սկզբում Ռաիսին ասել է, որ «Պաղեստինը իսլամական և մարդասիրական արժանապատվության բանալին է»։
Իրանի նախագահը նաև դատապարտել է Իսրայելին Գազայի հատվածի շրջափակման համար՝ այն համարելով միջազգային օրենքների կոպտագույն խախտում:
Նա հայտարարել է, որ «Ամերիկան է, ով հրամայել է իր գործընկերոջը՝ Սիոնիստական ռեժիմին, հանցագործություններ կատարել պաղեստինցիների դեմ»՝ մեղադրելով Վաշինգտոնին իսլամական երկրներում ճգնաժամերի համար։
Իրանի նախագահը կրկնել է օկուպացված տարածքներում հանրաքվե անցկացնելու իր կոչը՝ որպես հակամարտության միակ լուծում։
«Մենք կոչ ենք անում ամբողջությամբ վերացնել Գազայի շրջափակումը և առանց սահմանափակման վերաբացել Ռաֆահի անցակետը։ Մենք պետք է անհապաղ պահանջենք Սիոնիստական ռեժիմի դուրսբերումը Գազայից»,- ասել է Իրանի նախագահը։
«Բոլոր երկրները, այդ թվում՝ իսլամական երկրները, պետք է ապահովեն օկուպացված տարածքներում պաղեստինցիների անվտանգությունը։ Սիոնիստական ռեժիմի հետ առևտուրն ու համագործակցությունը պետք է դադարեցվի, իսկ իսրայելական ապրանքները պետք է բոյկոտվեն»,- հավելել է նա։
Ռաիսին նաև կոչ է արել իսլամական երկրներին զենք մատակարարել Պաղեստինի ժողովրդին։
«Մշտական և կայուն լուծումը ծովից գետ անկախ պաղեստինյան պետության ձևավորումն է»,- ասել է նա։
«Եթե մեր այսօրվա հանդիպումը գործողությունների չհանգեցնի, դա ավելի կվրդովեցնի մահմեդական ժողովուրդներին»,- եզրափակել է Իրանի նախագահը։
