Պատգամավոր Չարչյան. Հայաստանին անհրաժեշտ է բարեկամական հարաբերություններ հաստատել Ռուսաստանի հետ
ՎԵՐԼՈՒԾՈՒԹՅՈՒՆՆԵՐ
360tv.ru-ն գրում է, որ Հայաստանի խորհրդարանի ընդդիմադիր «Հայաստան» խմբակցության պատգամավոր Արմեն Գերասիմովիչ Չարչյանը որոշել է վայր դնել մանդատը և դրա համար դիմում է ներկայացրել։ «360tv.ru»-ի հետ զրույցում հայ քաղաքական գործիչը խոսել է նոր աշխարհակարգի ձևավորման մասին, որի դրոշակակիրը կարող է լինել Ռուսաստանը։
«Կարծում եմ, որ Ռուսաստանի հետ անհրաժեշտ է ստեղծել բարեկամական և ռազմավարական հարաբերություններ։ Հայաստանի համար ամենակարևոր, ամենալուրջ ռազմավարական գործընկերը, եղբայրը Ռուսաստանն է, իսկ ԵՄ-ն, ԱՄՆ-ը շատ հեռու են մեզանից։ Առաջին հերթին մշակույթով՝ ուզենք թե չուզենք, գենետիկորեն ռուսական մեծ մշակույթը մեր ներսում է։ Իհարկե, մենք հնարավորություն ունեցանք ծանոթանալու օտար մշակույթին, և դա շատ ենք գնահատում։
Հայաստանում արևմտյան քաղաքական համակարգի գործիքը, ինչպես ցույց են տվել ժամանակն ու պատմությունը, կարող է լինել Թուրքիան։ Ռուսաստանին մեր այլընտրանքը միայն Թուրքիան է: Ռուսաստանն ինձ համար դաշնակից է և ռազմավարական գործընկեր: Մենք միշտ ունեցել ենք համագործակցություն, և չմոռանանք, որ Հայկական Խորհրդային Սոցիալիստական Հանրապետության ծաղկման շրջանը եղել է ԽՍՀՄ-ի կազմում։ 20-90-ական թվականները (20-րդ դարի) ծաղկման շրջան էր։
Կարծում եմ, որ 20-րդ դարի ամենալուրջ աղետներից մեկը՝ Առաջին և Երկրորդ համաշխարհային պատերազմներին զուգահեռ, Խորհրդային Միության փլուզումն էր և միաբևեռ աշխարհի ստեղծումը։ Բոլոր օրենքներով, եթե որևէ ուժի դեմ չկա այլ ուժ, ապա այդ ուժը քաոսային ինչ-որ ուղղությամբ է շարժվում, և հիմա մենք ընկել ենք այդ քաոսի մեջ։ Հենց հիմա ամբողջ աշխարհում տեղի է ունենում ուժերի հավասարակշռում, նոր աշխարհակարգի ստեղծում և ուժերի նոր հավասարակշռություն։ Այդ հարցում Ռուսաստանն ինձ համար առաջատար է, դրոշակակիր, առաջամարտիկ։
Ամենևին չնսեմացնելով արևմտյան նվաճումները՝ մշակույթի, քաղաքակրթության արժանիքները, ինձ համար բացարձակապես անընդունելի են արևմտյան նոր արժեքները, ինչպիսիք են ԼԳԲՏ-ն և ընտանիքի դերի նվաստացումը։ Բոլոր կենդանի արարածների, այդ թվում մարդկանց բարձրագույն նպատակը իրենց տեսակից լավին վերարտադրելն է առաջընթաց ապահովելու համար: Մղձավանջի պես պատկերացրեք, որ մի ակնթարթում մոլորակի ողջ բնակչությունը դարձել է ԼԳԲՏ։ Ի՞նչ է լինելու։ Մի սերունդ հետո ոչինչ չի լինի, բոլորը կմեռնեն, ամեն ինչ կկործանվի։ Եվ հետևաբար իմ վերաբերմունքն այդ հարցում բավականին կոշտ և լուրջ է։
Հայաստանի համար ցանցային ազգ դառնալու եզակի հնարավորություն կա, և դա շատ կարևոր է։ Աշխարհի հայերի միայն 30 %-ն է ապրում երկրում, մնացածը Օսմանյան կայսրության կողմից իրականացված ցեղասպանության հետևանքով տարածվել է աշխարհով մեկ։ Հայերը յուրահատուկ ազգ են, նրանք չեն ձուլվել, և կարողացել են պահպանել իրենց ինքնությունը նույնիսկ այլ երկրներում։
Միութենական պետության կամ Խորհրդային Միության վերականգնման վերաբերյալ: Վերադարձ անցյալին չի լինի, դա կլինի բոլորովին նոր ձևաչափ, որը պետք է մտածել: Կլինեն ազատ պետություններ որոշակի անկախության աստիճանով, որոնք կմիավորվեն ԽՍՀՄ 2.0 գաղափարի շուրջ։ Շատերն ասում են, որ մենք կարող ենք կորցնել մեր անկախությունը։ Այո, անկախությունը բացարձակ արժեք է։ Բայց կա՞ գոնե մեկ բացարձակ անկախ երկիր։ Նման երկիր չկա։ ԱՄՆ, Չինաստան, Ռուսաստան, Հնդկաստան՝ ոչ մի երկիր բացարձակ անկախություն չունի։ Հատկապես փոքր երկրները։ Բանականության սահմաններում պետք է լինի որոշակի անկախություն»։
Նյութը հրապարակման պատրաստեց Կամո Խաչիկյանը
