Էրդողանը մտադիր է Պուտինի հետ քննարկել պաղեստինա-իսրայելական հակամարտությունը
ՔԱՂԱՔԱԿԱՆՈՒԹՅՈՒՆ
Թուրքիայի նախագահ Ռեջեփ Թայիփ Էրդողանը հայտարարել է, որ երեքշաբթի ավելի ուշ ներկայիս իրավիճակը կքննարկի Ռուսաստանի նախագահ Վլադիմիր Պուտինի և ՄԱԿ-ի գլխավոր քարտուղար Անտոնիո Գուտերեշի հետ, հայտնում է Anadolu-ն։
«Մենք կշարունակենք բանակցությունները Ծոցի երկրների հետ»,- ասել է նա Անկարայում Ավստրիայի կանցլեր Կարլ Նեհամերի հետ համատեղ մամուլի ասուլիսում։
Նա նաև կոչ է արել տարածաշրջանի բոլոր ազդեցիկ խաղացողներին «լրջորեն հանձնառու լինել Մերձավոր Արևելքում խաղաղության հաստատմանը»:
Ըստ Էրդողանի՝ անհրաժեշտ է խուսափել ցանկացած քայլից, «որը կարող է հանգեցնել լարվածության սրման, արյունահեղության կամ տարածաշրջանում խնդիրների սրման»։
Միաժամանակ, ըստ Թուրքիայի նախագահի, պաղեստինա-իսրայելական հակամարտությունը չի ավարտվի մեկ շաբաթում կամ 15 օրում։
Նա հավելել է, որ հակամարտության ընթացքում ՀԱՄԱՍ-ի կորուստներն արդեն հասել են մոտ 750 մարդու, ևս մոտ երկու հազար զինյալ վիրավորվել է։
ТАСС-ի փոխանցմամբ՝ Թուրքիայի նախագահը նաեւ ասել է, որ ամերիկյան «Ջերալդ Ֆորդ» ավիակրի՝ իսրայելա-պաղեստինյան հակամարտությանը միջամտությունը զանգվածային զոհերի կհանգեցնի։
«Ի՞նչ է անում ԱՄՆ ավիակիրն Իսրայելում։ Ինչու է այն գնում այնտեղ: Արդյո՞ք նա կգործարկի իր բոլոր ինքնաթիռները, նավակները, կշրջապատի Գազան և հարվածներ կհասցնի դրան՝ բացելով շատ լուրջ զանգվածային մահերի դուռ»: - հարցրեց Էրդողանը:
Նա նաև կշտամբել է ԱՄՆ-ին Սիրիայում թուրքական անօդաչու թռչող սարքի խոցման համար։
Էրդողանը հիշեցրել է, որ Թուրքիան երկրի գործընկերն է և ՆԱՏՕ-ի անդամ։ Վաշինգտոնի գործողությունները, որը Սիրիայում ավելի քան 20 ռազմաբազա է տեղակայել, չեն համապատասխանում դաշնակցային հարաբերությունների ոգուն, ասել է Էրդողանը։
