Ալիևը Միշելին ասել է, իբրև թե Ադրբեջանի ութ գյուղեր «դեռևս Հայաստանի օկուպացիայի ներքո են»
ՄԻՋԱԶԳԱՅԻՆ
Ադրբեջանի նախագահ Իլհամ Ալիևը և Եվրախորհրդի նախագահ Շառլ Միշելը շաբաթ օրը կայացած հեռախոսազրույցի ընթացքում մտքեր են փոխանակել տարածաշրջանային հարցերի շուրջ:
Զրույցը տեղի է ունեցել Միշելի նախաձեռնությամբ, հաղորդում է Ադրբեջանի նախագահի մամուլի ծառայությունը:
Ալիևը զրույցի ընթացքում նշել է, որ Գրանադայի հանդիպումից իր բացակայության պայմաններում քառակողմ հանդիպման (ԵՄ-Հայաստան-Ֆրանսիա-Գերմանիա) արդյունքներով ընդունված հայտարարության մեջ Ադրբեջանի հիշատակումը ճիշտ մոտեցում չէ:
՛՛Նախագահ Ալիևն ընդգծել է, որ Ադրբեջանը չի մասնակցել Գրանադայի հանդիպմանը Ֆրանսիայի հայտնի դիրքորոշման պատճառով ։ Ալիևը հատուկ նշել է, որ Հայաստանին զենք տրամադրելու Ֆրանսիայի ծրագրերը ծառայում են ոչ թե խաղաղությանը, այլ նոր դիմակայությանը: Եվ եթե տարածաշրջանում նոր դիմակայություն տեղի ունենա, ապա դրա պատճառը հենց Ֆրանսիան կլինի՛՛, - ընդգծվում է տեղեկատվության մեջ:
Ալիևը նաև անընդունելի է համարել Եվրախորհրդարանի՝ իր խոսքով՝ ՛՛հակաադրբեջանական՛՛ բանաձևը, ընդգծել, որ այն հիմնված է ՛՛այլատյացության և շովինիստական մոտեցման վրա՛՛: Նրա կարծիքով՝ այս բանաձևը չի նպաստի տարածաշրջանում խաղաղության և կայունության ապահովմանը։
Ալիևը զրույցի ընթացքում ընդգծել է, որ Ադրբեջանն ինքնապաշտպանության համար օգտվել է միջազգային իրավունքից և ՄԱԿ-ի կանոնադրությունից, ՛՛ամբողջությամբ վերականգնել է իր ինքնիշխանությունը և վնասազերծել ՛՛անօրինական զինված կազմավորումները՛՛, որոնք գտնվում էին ադրբեջանական տարածքում՛՛՝ հավելելով, որ այդ կապակցությամբ Ադրբեջանի ձեռնարկած բոլոր քայլերը ՛՛լիովին համապատասխանում էին միջազգային իրավունքին՛՛:
Ալիևը նշել է, որ Ադրբեջանի կենտրոնական իշխանությունները մարդասիրական օգնություն են ցուցաբերել Ղարաբաղի հայերին, և սկսվել է նրանց գրանցման գործընթացը: ՛՛Ալիևը նշել է, որ հենց ՛՛անօրինական անջատողական՛՛ ռեժիմն է ստիպել Ղարաբաղի հայերին լքել այդ տարածքը եւ տեղափոխվել Հայաստան",- ընդգծվում է տեղեկատվության մեջ:
Ալիևը նաև նշել է, որ Ադրբեջանի 8 գյուղեր դեռևս ՛՛գտնվում են Հայաստանի օկուպացիայի տակ՛՛, ընդգծել դրանց ՛՛դեօկուպացիայի՛՛ կարևորությունը:
՛՛Միշելն իր հերթին վերահաստատել է ԵՄ պատրաստակամությունը՝ շարունակելու աջակցել Հայաստանի և Ադրբեջանի միջև հարաբերությունների կարգավորմանը՛՛, - ընդգծում է Ադրբեջանի ղեկավարի մամուլի ծառայությունը:
