Վերին Լարսի անցակետում հայկական կոնյակով մոտ 100 բեռնատար է կուտակվել. խնդիրը կարող է վերաբերել նաև գինիներին.News.am
ՏՆՏԵՍՈՒԹՅՈՒՆ
Վերին Լարսի անցակետում իրավիճակը սրվել է, այնտեղ արդեն կուտակվել է հայկական կոնյակով մոտ 100 բեռնատար։ Այս մասին NEWS.am-ի թղթակցի հետ զրույցում ասաց Հայաստանի գինեգործության ազգային կենտրոնի նախագահ Ավագ Հարությունյանը։
Նա պարզաբանեց, որ յուրաքանչյուր բեռնատարը պարունակում է մոտավորապես 20 հազար շիշ, որոնցից յուրաքանչյուրն արժե մոտավորապես 7 դոլար։ Այս թվերի հիման վրա անցակետում պարապուրդի է մատնված մոտ 14 մլն դոլարի ապրանք։
Հարությունյանն ասաց, որ ռուս մաքսավորները մի քանի բեռնատարներ են թույլ տվել անցնել, սակայն այս ընթացքում նույնքան էլ կուտակվել է։
Հիշեցնենք, որ նախկինում հաղորդվում էր կոնյակով բեռնված 60 բեռնատարի մասին։
«Պաշտոնապես պատճառն այն է, որ խաղի կանոնները փոխվել են, հիմա ԵԱՏՄ վկայականները չեն անցնում, անցնում են միայն ռուսական սերտիֆիկատները։ Այդ մի քանի բեռնատարները, որոնք ռուսական իշխանությունները բաց թողեցին, ունեին ռուսական վկայականներ։
Միակողմանի որոշում է կայացվել. Բայց սա պաշտոնականն է, իսկ ոչ պաշտոնապես խոսքը քաղաքական որոշման մասին է»,- նշեց փորձագետը։
Նա պարզաբանեց, որ Ռուսաստանի օրենսդրությունը թույլ է տալիս շրջանցել ԵԱՏՄ շրջանակներում ընդունված կարգավորումները։
«Ժամանակ է պետք խաղի նոր կանոններին հարմարվելու համար, քանի որ ռուսական վկայական ստանալու համար կպահանջվի մեկ ամիս։ Միևնույն ժամանակ, Ռուսաստանի իշխանությունները սովորաբար մերժում են այդ վկայականի խնդրանքը՝ հիմնվելով փորձաքննության արդյունքների վրա։
Այս խնդիրը գոյություն ունի արդեն երեք ամիս, և առաջացել է դեռևս Հայաստանի և Ռուսաստանի միջև լարվածության վերջին աճից առաջ։ Նման խնդրի առաջ է կանգնած նաև Բելառուսը։ Սակայն, եթե նախկինում ընտրովի մոտեցում էր կիրառվում հայ արտահանողների նկատմամբ (թույլատրվում էին որոշ ապրանքանիշերի բարձր վարկանիշ ունեցող ապրանքներ), ապա այժմ արգելքը ազդել է բոլորի վրա։ Ակնհայտ է, որ Հայաստանից կոնյակի ներկրումն ամբողջությամբ կասեցնելու որոշումը քաղաքական բնույթ է կրում։
Առայժմ խնդիրը վերաբերում է միայն կոնյակին, բայց ասում են, որ սահմանափակումները կազդեն նաև գինի արտահանողների վրա»,- եզրափակեց Հարությունյանը։
Արամ Դանիելյան
