Արցախ ռուսներին Փաշինյանն է բերել

Փաշինյանական վարչախումբն այլևս իր համար գլխավոր թիրախ է ընտրել Ռուսաստանի ռուս խաղաղապահներին և հենց նրանց է մեղադրում Արցախը հանձնելու մեջ։ Որ ռուսական կողմի նկատմամբ կարելի է լուրջ վերապահումներ ունենալ ոչ ոք չի ժխտում, սակայն Նիկոլ Փաշինյանն ու իր սպասարկուները մոռանում են ամենակարևոր հանգամանքը։

1994 թվականի հրադադարի պայմանագրից հետո, ռուսական որևէ ուժ Արցախում չի եղել։ Ռուս քաղաքական գործիչներն ու վերլուծաբաններն էլ Արցախ այցելել են որպես հյուր, իսկ 2020 թվականին 44-օրյա պատերազմից հետո, Ռուսաստանը ոչ միայն «խաղաղապահ» ուժեր տեղակայեց Արցախում, այլ նաև կարելի է ասել իր ձեռքը վերցրեց իշխանությունը, և ռուսներն Արցախում հայտնվեցին ոչ թե Արցախի իշխանությունների կամ ընդդիմության ջանքերով, այլ հենց Նիկոլ Փաշինյանի ստորագրած համաձայնագրով։

Նոյեմբերի 9-ի հայտարարությունը հստակ արձանագրումներ էր անում ռուս խաղաղապահների զորակազմի լիազորությունների վերաբերյալ և այդ հայտարարության տակ ոչ թե արցախի ռազմաքաղաքական էլիտայի ներկայացուցիչների ստորագրությունն էր, այլ հենց Նիկոլ Փաշինյանի։

Ըստ էության, Փաշինյանն իր ձեռքով է ռուսներին բերել Արցախ, իր ձեռքով է նրանց հանձնել Արցախի իշխանությունը, առանց հստակ պայմանավորվելու նրանց լիազորությունների և կատարելիք քայլերի հերթականությունը, ուստի այսօր այլոց մեղադրելու ռուսամոլության մեջ, Փաշինյանը և նրա սպասարկուները պետք է գետինը մտնեն, ամաչեն, որ հենց իրենց ջանքերով է, որ ռուսական խաղաղապահ զորախումբը տեղավորվել է Արցախում։ Այլոց ռուսամետության մեջ մեղադրող գործող իշխանությունները հենց իրենք են ռուսների ամենամեծ խամաճիկները։

Լիա Ղազարյան