Մինչ կալանավորումը Վարդանյանը The Guardian-ին ասել էր, որ պատրաստ է մեռնել հանուն իր երկրի
ՎԵՐԼՈՒԾՈՒԹՅՈՒՆՆԵՐ
Forbes.ru-ն գրում է, որ ադրբեջանական կողմից ձերբակալված չճանաչված Լեռնային Ղարաբաղի Հանրապետության կառավարության նախկին ղեկավար Ռուբեն Վարդանյանն անցյալ շաբաթ The Guardian-ին տված հարցազրույցում ասել էր, որ Բաքվի «հակաահաբեկչական գործողության» մեկնարկից հետո ինքը լինելու է ադրբեջանական զինուժի թիրախում։ «Այդպիսին է կյանքը: Եթե պատրաստ ես մեռնել հանուն քո երկրի, ուրեմն ամեն ինչ կարգին է: Դրանում ոչ մի լավ բան չկա, բայց դուք պետք է պատրաստ լինեք դրան, եթե ինչ որ կարևոր բան եք անում (...) Եվ ես պատրաստ էի առաջին իսկ օրվանից, ես դա գիտեի»,- թերթին ասել է Վարդանյանը:
«Տաշիր» ընկերությունների խմբի նախագահ Սամվել Կարապետյանը չորեքշաբթի երեկոյան Վարդանյանի կալանավորումն անվանել է «բացահայտ անարդարության արարք»։ «Ռուբենին ճանաչում եմ որպես իսկական հայրենասերի, ով ժողովրդի հետ միասին անցել է հայրենիքին պատուհասած ծանր փորձությունների միջով»,- Armenia Today-ի փոխանցմամբ ասել է Կարապետյանը։ Գործարարը կոչ է արել ՀՀ ԱԳՆ-ին շտապ միջոցներ ձեռնարկել Վարդանյանի վերադարձի համար։
Ավելի վաղ ՀՀ կառավարությունը դիմել էր Մարդու իրավունքների եվրոպական դատարան Վարդանյանի պաշտպանությունն ապահովելու հարցով։ «Մասնավորապես, մենք Բաքվից պահանջել ենք տեղեկություններ տրամադրել Վարդանյանի կալանավորման վայրի և առողջական վիճակի մասին», - ասել է միջազգային իրավական հարցերով Հայաստանի ներկայացուցչի գրասենյակի մամուլի քարտուղար Հասմիկ Սամվելյանը։ Հայաստանի ԱԳՆ-ն խոստացել է ձեռնարկել բոլոր միջոցները Վարդանյանին Ադրբեջանից վերադառնալու համար։
Վարդանյանը չճանաչված Լեռնային Ղարաբաղի Հանրապետության կառավարությունը ղեկավարել է 2022 թվականի նոյեմբերից մինչև 2023 թվականի փետրվարը։ Նրան զբաղեցրած պաշտոնից ազատել է չճանաչված հանրապետության այն ժամանակվա նախագահ Արայիկ Հարությունյանը։ Հրաժարականից հետո Վարդանյանն ասել է, որ չի պատրաստվում լքել Լեռնային Ղարաբաղը։ Նա այն ժամանակ նշել է, որ «ճնշումներ» են եղել տարածաշրջանում իր ներկայության պատճառով։
Վարդանյանը «Տրոյկա Դիալոգ» ներդրումային ընկերության նախկին ղեկավարն է և Մոսկվայի «Սկոլկովո» կառավարման դպրոցի առաջին նախագահը։ Մինչև 2022 թվականը նա ընդգրկված էր ռուսական Forbes-ի ցուցակում, այժմ ընդգրկված է Forbes-ի վարկածով մոլորակի ամենահարուստ գործարարների համաշխարհային ցուցակում որպես հայ միլիարդատեր։ Նրա կարողությունը գնահատվում է 1,2 միլիարդ դոլար ըստ Forbes Real-Time վարկանիշի, որը թարմացվում է իրական ժամանակում։
Նյութը հրապարակման պատրաստեց Կամո Խաչիկյանը
