Կարմիր բերետավորները քիչ առաջ Երեւանի Թումանյան փողոցում սկսեցին բերման ենթարկել անհնազանդության ակցիային մասնակցող քաղաքացիներին:
«Ի՞նչ են արել էս մարդիկ, դուք հայ չե՞ք: Ձեզ հայ ասողի հերն եմ անիծել, էդ երեխեքի արյունը ձեր բոլորի վրա է: Տանում եք, որ մեքենայի մեջ 5 հոգով ծեծե՞ք: Օրենք ցույց տվեք, թե ինչի համար եք տանում»,- բաղում էին ակցիայի մասնակից կանայք:
Նշենք, որ Հանրապետության հրապարակում ոստիկանական մեծ ուժեր են կուտակվել։
Ավելի վաղ NEWS.am-ը հայտնել էր, որ սեպտեմբերի 19–ին Արցախի դեմ սանձազերծված ադրբեջանական նոր ագրեսիայի ֆոնին Երևանում մասշտաբային ցույցեր են սկսվել։ Մարդիկ պատասխան են պահանջում ՀՀ իշխանություններից Արցախի հարցում դրսևորած անգործության համար։
Երևանի տարբեր բուհերի ուսանողներ միացել են ակցիային և կոչ են անում բոլոր վարորդներին թողնել մեքենաներն ու միանալ իրենց։ Բոլորն ընդգծում են, որ Արցախում այսօր ցեղասպանություն է և պետք է անհապաղ քայլեր ձեռնարկել։ Ցուցարարները վանկարկում են՝ «Արցախ», «միացեք»։
Երևանի Հանրապետության հրապարակ բազմաթիվ ոստիկանական ուժեր են բերվել, իրավապահները շղթա կազմած կանգնած են կառավարության շենքի դիմաց։
ՀՀ առաջին վարչապետ, Ազգային կոմիտեի անդամ Վազգեն Մանուկյանը երեկ Հանրապետության հրապարակում հրավիրված հանրահավաքի ժամանակ հայտարարեց, որ երեք օր շարունակ վաղ առավոտից մինչև երեկո Հայաստանը պարալիզացվելու է։
