Քաղաքացիները հրապարակից շարժվեցին տարբեր ուղղություններով. նրանք փողոցներ են փակում
ՔԱՂԱՔԱԿԱՆՈՒԹՅՈՒՆ
Քաղաքացիները հրապարակից շարժվեցին տարբեր ուղղություններով. նրանք փողոցներ են փակում՝ կաթվածահար անելով երթևեկությունը:
Քաղաքացիների մի մասը շարժվել է դեպի Արշակունյաց պողոտա, մի մասը դեպի քաղաքապետարան, մյուս մասը Մաշտոցի պողոտա:
Հրապարակում ելույթ ունենալիս Անդրանիկ Թևանյանը հայտարարել է, որ վաղվանից հայտարարվում է դասադուլ և գործադուլ.
«Հորդորեք, ստիպեք նույնը անել դասախոսներին: Հայտարարում եք դասադուլ և ինքնակազմակերպված փակում եք փողոցները: Ռեկտորներին՝ չփորձեք որևէ խոչընդոտ առաջացնել, որովհետև ձեր անունները հնչելու են հենց այս հրապարակում»,- ասաց Անդրանիկ Թևանյանը:
Նա հայտարարեց, որ վաղ 7:30-ից բոլոր խմբերով Երևանի տարբեր հատվածներում փակելու են խաչմերուկներ և փողոցներ, որպեսզի կաթվածահար անեն երթևեկությունը.
«Թույլ է տրվում միայն շտապ օգնության, հրշեջ մեքենաների և միայն խիստ անհրաժեշտության գնացող մեքենաների»:
Թևանյանը նաև շեշտեց, որ քաղաքացիները որևէ կերպ ոստիկանության հետ բախման չգնան. «Եթե տեսնում եք, որ այդտեղ խնդիր ունեք, շատ մանր խմբերով ցրվում եք ու փակում եք հարակից փողոցը: Ով ոստիկանական բաժնում չհայտնվեց՝ չեմպիոն է: Խնդիրը ձերբակալվելը կամ բերման ենթարկվելը չէ, այլ մեր բողոքը ցույց տալն է»:
Թևանյանը անդրադառնալով գործադուլին՝ հայտարարեց, որ հայ գործարարները թույլ տան իրենց աշխատակիցներին՝ միանալ անհնազանդության ակցիաներին. «Հայտարարեք գործադուլ, Գագիկ Ծառուկյան, Վարդանյան եղբայրներ, Սամվել Ալեքսանյան, Սամվել Կարապետյան, ռուսական խոշոր ընկերություններ, դուք պետք է միանաք ցույցերին ձեր աշխատակիցների հետ: Խաչատուր Սուքիասյան, Գուրգեն Արսենյան, եթե դուք հանկարծ խոչընդոտեք ձեր աշխատակիցների գործադուլին, այս ժողովրդով ձեր հիմնարկ ենք գալու: Հանկարծ մտքներովդ չանցնի ճնշել աշխատակիցներին»:
