Շոյգուն հայտարարել է Ռուսաստանի և Իրանի հարաբերությունները նոր մակարդակի անցնելու մասին

Մոսկվան և Թեհրանն ամրապնդում են իրենց ռազմավարական գործընկերությունը պաշտպանական ոլորտում։ Այս մասին հայտարարել է ՌԴ պաշտպանության նախարար Սերգեյ Շոյգուն իրանցի գործընկեր Մոհամմադ Ռեզա Աշտիանիի հետ բանակցություններում։

«Մենք նպատակ ունենք իրականացնել պլանավորված գործողությունների ողջ շրջանակը, չնայած ԱՄՆ-ի և նրա արևմտյան դաշնակիցների հակազդեցությանը: Ռուսաստանի և Իրանի վրա պատժամիջոցների ճնշումը ցույց է տալիս դրա անիմաստությունը, մինչդեռ ռուս-իրանական փոխգործակցությունը նոր մակարդակի է հասնում», - ասաց նա:

Նախարարն իր պատրաստակամությունն է հայտնել Մերձավոր Արևելքում կայունության և անվտանգության ամրապնդման ոլորտում հետագա համատեղ գործողությունների համար և գոհունակությամբ նշել, որ ռուս-իրանական երկխոսությունը ինտենսիվ զարգանում է։

Նրա խոսքով՝ դա մեծապես պայմանավորված է Ռուսաստանի և Իրանի առաջնորդների միջև ձևավորված վստահությամբ։

«Հանդիպումների բարձր դինամիկան հաստատում է պաշտպանության ոլորտում ռազմավարական գործընկերության և ռազմական համագործակցության հետագա ամրապնդման ընդհանուր տրամադրվածությունը»,- ընդգծել է Շոյգուն։

Հիշեցնենք, որ նախօրեին Շոյգուի գլխավորած պատվիրակությունը ժամանել էր Թեհրան՝ բանակցություններ վարելու Իրանի ռազմական ղեկավարության հետ։ Ինչպես նշել են ՌԴ ռազմական գերատեսչությունում, այս այցը կօգնի ամրապնդել ռուս-իրանական ռազմական կապերը և կդառնա երկու երկրների միջև համագործակցության զարգացման կարևոր փուլ։