Երևանի ավագանու ընտրությունները կդնեն իշխանության վերջի սկիզբը

«Գելլափ Ինթերնեյշնլ Ասոցիացիան» երեկ հրապարակել է իր հերթական ամենշաբաթյա հարցման արդյունքները՝ նշելով, թե Երևանի ավագանու ընտրություններում ֆավորիտները շարունակում են մնալ Տիգրան Ավինյանն ու Հայկ Մարությանը, ընդ որում, ըստ հարցման մասնակիցների՝ միայն 16,3 %-ն է քվեարկելու «Քաղաքացիական պայմանագիր» կուսակցության օգտին։ Երկրորդ տեղում «Ազգային առաջընթաց» կուսակցութունն է՝ քաղաքապետի թեկնածու Հայկ Մարությանի գլխավորությամբ՝ 11,8 %-ով, իսկ երրորդը՝ 5,1 %-ով «Մայր Հայաստան» դաշինքը։ Առայժմ ավագանի անցնելու շանսեր ունեն դեռ «Հանրապետություն» կուսակցությունը, «Հանրային ձայնը», «Ապրելու երկիր» կուսակցությունը։

Հարցումների այս արդյունքների հետ կարելի է համաձայնվել, կարելի է լուրջ չընկալել, սակայն մի էական հանգամանք բացհայտում է ողջ իրականությունը։ Հարցվածների 22,8 %-ը դժվարացել է պատասխանել, իսկ 20 %-ն էլ հրաժարվել է հայտնել, թե ում օգտին է քվեարկելու։ Նույն հաջողությամբ թե հրաժարվողներն ու չկողմնորոշվածները, կամ համենայնդեպս այդպես հայտարարողները, կարող են ընտրել, թե՛ ընդդիմության ներկայացուցչին և թե՛ իշխանության։

Եթե ընդդիմության ներկայացուցչին ընտրելու դեպքում նրանք կարող են վախենալ գործող իշխանությունների վրեժխնդրությունից, ապա իշխանությանն ընտրողներն էլ կարող են վախենալ ծաղրանքից, իրենց նկատմամբ արդարացված վրդովմունքից, ուստի ինչպես շատ ավելի վաղ նշել էինք, Երևանի ավագանու այս ընտրությունները և հարցման արդյունքները վկայում են, որ հնարավոր է չափազանց տարօրինակ անակնկալներ՝ այդ թվում ինչպես դրական, այնպես էլ բացասական եզրավորմամբ։ Ի վերջո ուժերից մեկը Երևանի քաղաքապետ ընտրվելու համար պետք է ունենա 50 % գումարած 1 ձայն, սակայն այս պահի դրությամբ նույնիսկ «Քաղաքացիական պայմանագրին» իր վարչական, ֆինանսական, ոստիկանական ռեսուրսներով չի հաջողվի հավաքել այդ տոկոսը և գլխավոր ինտրիգը մնալու է, թե ովքեր են անցնելու ավագանի և արդյոք անցած ուժերը կկարողանան կոալիցիա կազմել ընդդեմ իշխանության, և Փաշինյանին զրկել իշխանությունից Երևանում։ 

Նարինե Սարատիկյան