Բաբայանը հորդորեց բացառել Արցախի ներսում ցանկացած սադրանք. հակառակորդը կօգտվի դրանից
ՔԱՂԱՔԱԿԱՆՈՒԹՅՈՒՆ
Երբ լինում են լուրջ փոփոխություններ, որոնց մեջ մտնում է նաեւ նախագահի փոփոխությունը, հատկապես ներկա պայմաններում, իրավիճակը լիցքաթափելու համար ժամանակ է պետք։ Իրավիճակը լիցքաթափելու ամենակարեւոր ելակետը նոր նախագահի ընտրությունն է։ Այս մասին NEWS.am -ի թղթակցի հետ զրույցում ասաց Արցախի նախագահի խորհրդական Դավիթ Բաբայանը։
Նա բնական համարեց ընտրություններից առաջ ակտիվությունը՝ միաժամանակ կոչ անելով բացառել ցանկացած սադրանք, բացառել ցանկացած սադրիչների՝ գործընթացը տապալելուց։
Նրա խոսքով` ապակայունացման ցանկացած կոչին պետք է հաջորդի ժողովրդի արձագանքը, որը չպետք է թույլ տա, որ նման սցենար զարգանա։
«Պետք է ուժեղացնել պետական համակարգը: Խոսքի ազատությունը կա, բայց եթե դա հակասում է օրենքին և կարող է լուրջ վնաս հասցնել պետությանը, ապա նման խոսքերի հեղինակները պետք է պատասխանատվության ենթարկվեն։ Եթե մեզ չհաջողվի նման պետական համակարգ ձեւավորել, քաոսը կշարունակվի։ Եթե որոշակի փոփոխությունների արդյունքում ձեւավորվի հայրենասերներից բաղկացած ճկուն, պրոֆեսիոնալ համակարգ, ապա դրական փոփոխություններ կլինեն։ Պետք է ձգտել ձևավորել հենց այդպիսի համակարգ։ Պատահականություններ չպետք է լինեն: Պրոֆեսիոնալիզմի կամ հայրենասիրության պակաս լինելը կամ բացակայությունը վտանգ է պարունակում։ Միևնույն ժամանակ, հայրենասիրության բացակայությունն ավելի լուրջ վտանգ է ներկայացնում, քան պրոֆեսիոնալիզմի պակասությունը կամ բացակայությունը։ Պետական համակարգբ արդիականացման կարիք ունի, այնտեղ կան պատահական մարդիկ, որոնց ներկայությունը միայն վնաս է պատճառում»,- ասաց Արցախի նախագահի խորհրդականը։
Նա ընդգծեց, որ նոր նախագահը պետք է հնարավորինս սեղմ ժամկետներում եւ հատկապես դրսից լուրջ ճնշման տակ կատարի շատ բարդ առաքելություն։
«Միևնույն ժամանակ, եթե լավ թիմ հավաքվի, ապա մենք կկարողանանք դիմակայել ճնշմանը։ Յուրաքանչյուր մարտահրավեր նաև նոր հնարավորություն է, եթե ճիշտ աշխատես: Հակառակ դեպքում, մարտահրավերը դառնում է մահացու վտանգ»,- ասել է Արցախի նախագահի խորհրդականը։
Նա Արցախի նոր պետնախարար Սամվել Շահրամանյանին հայրենասեր անձնավորություն անվանեց, ով գիտի թիմային աշխատանք և խորհուրդներ լսել։
«Լավագույն լուծումը կլինի համապետական նախագահական ընտրությունների անցկացումը, քանի որ ընտրությունների միջոցով ձևավորված ներկայիս համակարգը չի արտացոլում իրական իրավիճակը, սակայն այս պահին ընտրությունների անցկացումն անհնար է»,- հավելեց Արցախի նախագահի խորհրդականը։
Ուստի ստեղծված իրավիճակում Բաբայանն ամենաընդունելին համարեց նախագահի ընտրությունը խորհրդարանի կողմից։
«Նախագահն իր կամքով է հրաժարական տվել, նրան ոչ ոք չի ստիպել։ Այս փուլն արդեն անցել է, հիմա պետք է նոր փուլ անցնել և նոր նախագահ ընտրել։ Եթե մենք դա չանենք, ուր մնաց արյուն թափենք, դա սարսափելի հանցագործություն կդառնա։ Սա չի կարելի թույլ տալ: Եթե պետք է դիմել ժողովրդին, որպեսզի ոչ ոք սադրանքների չտրվի, ապա դա կարվի։ Հակառակորդը կօգտվի անկայունությունից»,- եզրափակեց նա։
