«Դոպինգ Սփեյս»-ի տնօրենը և մի շարք պաշտոնատար անձինք պետք է պատասխանատվության ենթարկվեն հանրային միջոցների վատնման համար․ Էդգար Ղազարյան

Ռեփեր Սնուփ Դոգգի համերգի ֆինանսավորումը պետական բյուջեից անօրինական է, որովհետև դա նախատեսված չի եղել ո՛չ կառավարության կողմից հաստատված միջնաժամկետ ծախսային ծրագրով, ոչ էլ 2023 թվականի պետական բյուջեի մասին օրենքով։ Այս մասին Tert.am-ի հետ զրույցում ասաց արտակարգ և լիազոր դեսպան, Սահմանադրական դատարանի աշխատակազմի նախկին ղեկավար Էդգար Ղազարյանը։ 

Ղազարյանը նշեց, որ համերգի համար նախատեսված գումարը կառավարությունը հատկացրել է պետական բյուջեում բոլոր մշակութային միջացառումների համար նախատեսված գումարից ու հավելյալ միջոցներ կառավարության պահուստային ֆոնդից։

«Իսկ բյուջետային համակարգի մասին ՀՀ օրենքով՝ կառավարության պահուստային ֆոնդից միջոցները ծախսվում են բացառապես չնախատեսված ծախսերի, հրատապ նշանակութուն ունեցող խնդիրների լուծման համար, օրինակ՝ տարերային աղետի հետևանքների վերցացում և այլն։ Չի կարող համերգի ֆիանսավորումն իրականացվել պահուստային ֆոնդից։ Բացի դրանից, այս երգիչը դեռևս իր պատմության ընթացքում չի ունեցել պետական աջակցությամբ համերգ։ Ընդհանրապես այդ տիպի երգիչների համերգներն առևտրային են։ Այսինքն՝ հայտնվում է պրոդյուսերային ընկերություն, որը նրան վճարում է հոնորար, կազմակերպչական ծախսերն է հոգում, տոմսերն են վաճառվում, և որպես առևտրային պրոյեկտ են իրականացնում»- պարզաբանեց հասարակական գործիչը։

Ղազարյանը նշեց, որ կառավարությունը ֆինանսավորել է մի ընկերության, որը հիմնադրվել է 2023 թվականի հուլիսի 4-ին։ 

«Այսինքն հուլիսի 4-ին հիմնադրված առևտրային ընկերությունը, որը ո՛չ հիմանդրամ է, ո՛չ բարեգործական կազմակերպություն է և այլն։ Ընդամենը 2 սեփականատեր ունեցող ընկերությունն է, ընդ որում սեփականատերերից մեկին հրավիրել են գլխավոր դատախազություն՝ ապօրինի հարստացման գործով։ Նա, դատախազության կարծիքով, ունի ապօրինի ձեռք բերած գույք։ Եթե նայեք այդ համերգի ծախսերը, ապա կնկատեք, որ կառավարությունը հոգում է բոլոր ծախսերը՝ հյուրանոցի, սննդի, տեխնիկական, աշխատավարձը։ Այդ ընկերության տնօրենի աշխատավարձը կազմում է 5 միլիոն 6 հարյուր հազար դրամ։ Ընկերությունն իր տնօրենին աշխատավարձ չի տալիս, այդ աշխատավարձն էլ է նախատեսված կառավարության կողմից։ Ընկերության տերը պետք է ստանա վարչապետի աշխատավարձից 5 անգամ բարձր գումար։ Որևէ տրամաբանություն գոյություն չունի»,- հավելեց արտակարգ և լիազոր դեսպանը։ 

Էդգար Ղազարյանն ընդգծեց, որ պետական տոների և հիշատակի օրերի համար պետական բյուջեով նախատեսված է ընդամենը 40 միլիոն դրամ, իսկ միայն այդ համերգի պետական աջակցությունը 2 մլրդ 300 մլն դրամ է։

«Չնայած կառավարությունը ծածկում է համերգի համար բոլոր ծախսերը, պարզվում է, որ համերգն էլ անվճար չէ։ Այսինքն՝ նման դեպքերում համերգը, ենթադրենք, պետք է լիներ բացօթյա մի տեղ, ով որ ցանկանում էր, անվճար հիմունքներով պետք է մասնակցեր։ Բայց պարզվում է, որ այդ ընկերությունը նաև տոմսեր է վաճառում, ստանալու է հասույթ, որը մնալու է որպես շահույթ։ Սա օրենքով քրեական հանցագործություն է, պետական միջոցների վատնում։ Որովհետև եթե այդ համերգը պետական կարևորություն ունենար, ԿԳՄՍ նախարարության համակարգում կան տասնյակ կազմակերպություններ, մշակութային խմբեր, կոլեկտիվներ,  ինչպես նաև հայ ֆիլհարմոնիա, որի նպատակն է համերգների կազմակերպումը։ Հիմա հարց է առաջանում, եթե բոլոր ծախսերը պետությունն է փոխհատուցում, ապա ինչո՞ւ դա չի իրականացվում ԿԳՄՍՆ-ի, հայ ֆիլհարմոնիայի միջոցով, այլ 1 ամիս առաջ հիմնադրված ընկերության միջոցով»,- ընդգծեց հասարակական գործիչը։

Նա ասաց, որ Հայաստանը, արցախահայությունը աղետալի վիճակում են․ «Հայաստանի վարչապետն է կառավարության նիստին ասում, որ ցեղասպանության վտանգ կա, պետական բյուջեի միջոցներով կազմակերպվում է համերգ։ Մեր պետությունը ի վիճակի չէ հումանիտար բեռ հասցնել Արցախ, բայց պարզվում, է որ ի վիճակի է կազմակերպել մի ռեփ երգիչի համերգ։ Եթե դա վերաբերեր ժողովրդական գործիքներին, ազգային պարարվեստին, և այլնին, հասկանալի կլիներ, որ պետական  աջակցության կարիք կա։ Ես համեմատություն եմ արել բոլոր թանգարանների համար պետական բյուջեով որքան գումար է նախատեսված, ու այդ համերգի համար որքան գումար է նախատեսված»։ 

«Վարչապետը կառավարության նիստում ասում է, որ թանագարանները, կարող է, փակենք, որովհետև թանգարաններն այցելուներ չուեն։ Բայց պարզվում է, պետբյուջեից թանգարանների ֆինանսավորումն ավելի քիչ է, քան այդ համերգի պետական ֆինանսավորումը։ Այն գրեթե հավասար է ՀՀ նախագահի աշխատակազմի մեկ տարվա ծախսերին։ Պատկեարցնո՞ւմ եք, 2 ժամանոց համերգի ծախսը նախագահի ամբողջ աշխատակազմի բորոի աշխատավարձերի, բենզինի, կոմունալ ծախսերի, գործուղումների և այլնի ծախսերի չափ է»,- հավելեց Ղազարյանը։ 

Հարցին՝ երկրում իշխանափոխության դեպքում հնարավո՞ր է, որ համերգի կազմակերպիչները, «Դոփինգ Սփեյսի» տնօրենը, ԿԳՄՍ նախարարությունը պատասխանտվության ենթարկվեն, հասարակական գործիչը պատախանեց, որ «անպայման»։

«Ես իմ լայվում համեմատություն էի արել։ Քննչական կոմիտեն հաղորդագրություն էր տարածել, որ 11 միլիոն դրամի չարաշահման համար ձերբակալություններ են իրականացվել, քրեական  գործ են հարուցել մի կազմակերպության դեմ։ 11 միլիոն դրամն ուր, 2 միլարդ 3 հարյուր մլն դրամն ուր։ Դա ակնհայտորեն հանրային միջոցների վատնում է, ընդ որում, իրականացվել է կազմակարպված հանցավոր խմբով, որում ներքաշվել են պաշտոնատար անձինք՝ օգտագործելով իրենց պաշտոնական դիրքն ու լիազորությունները՝ վարչապետի գլխավորությամբ»,- եզրափակեց Էդգար Ղազարյանը։

Նշենք, որ Tert.am-ի գրավոր հարցմանն ի պատասխան ԿԳՄՍ նախարարությունից տեղեկացրել են, որ կառավարությունը Սնուփ Դոգգի համերգից ստացված հասույթից որևէ եկամուտ չի ունենալու, ամբողջ հասույթը տնօրինելու է «Դոպինգ Սփեյս» ընկերությունը, բայց պարտավոր է պետբյուջե վճարումներ կատարել։