Մեկնարկեցին դանդաղ, լիցքավորված են պոպուլիզմով. Երևանում գնահատվել է նախընտրական քարոզարշավի սկիզբը
ՎԵՐԼՈՒԾՈՒԹՅՈՒՆՆԵՐ
Eadaily.com-ը գրում է, որ Երևանի ավագանու (օրենսդիր ժողովի) ընտրությունների նախաշեմին «Ժողովրդի ձայն» փորձագիտական ակումբը մշտադիտարկում է անցկացրել` նվիրված նախընտրական քարոզարշավի մեկնարկին և քաղաքական ուժերի մեկնարկային հնարավորություններին։
Փորձագիտական ակումբի ֆոկուս խմբերն արձանագրել են, որ նախընտրական քարոզարշավի սկիզբը բավականին պասիվ է ստացվել, ընտրություններին մասնակցող և Հայաստանի մայրաքաղաքի քաղաքապետի պաշտոնին հավակնող քաղաքական ուժերի նախընտրական պայքարը դեռ զուրկ է դինամիզմից: Միաժամանակ, նախընտրական քարոզարշավի առաջին շաբաթվա ընթացքում ակնհայտ է ոչ միայն քաղաքական միավորումների, այլ նաև երեւանցիների պասիվությունը։
Փորձագետները նշում են, որ քարոզարշավի առաջին շաբաթվա արդյունքներով քաղաքական ուժերը դեռ չեն կարողացել հետաքրքրել երևանցիներին և իրենց նախընտրական օրակարգով գրավել նրանց ուշադրությունը։ Նկատելի է նաև, որ որոշ ուժեր փորձում են առաջիկա մունիցիպալ ընտրություններին արտաքին քաղաքական ֆոն հաղորդել` ընդհուպ հակառուսական տրամադրություններ հրահրել։ Օրինակ, Հայաստանի եվրոպական կուսակցության տխրահռչակ առաջնորդ Տիգրան Խզմալյանը քարոզարշավ է իրականացնում ԵՄ դրոշի ներքո, իսկ «Հանրապետություն» կուսակցության նախագահ Արամ Սարգսյանը նախընտրական քարոզարշավի ժամանակ կրկին բարձրացնում է ՀԱՊԿ-ից Հայաստանի դուրս գալու հարցը։
Ի տարբերություն նրանց, մասնավորապես, «Հանուն սոցիալական արդարության» կուսակցությունը դիրքավորվում է որպես հայ-ռուսական հարաբերությունների զարգացմանն ու ամրապնդմանը ջատագովող ուժ։
Մոնիտորինգի փորձագետները նշում են, որ քարոզարշավի ընթացքում քաղաքական ուժերի մեծ մասում տիրում է պոպուլիզմը. իրական խնդիրները չեն արտացոլվում. և դրանց լուծման ուղիներ չեն ներկայացվում։ Փոխարենը պարտադրվում է դժվար իրագործելի ծրագրերով այլընտրանքային իրականություն։
Այսպես, իշխող «Քաղաքացիական պայմանագիր» կուսակցության թեկնածու, փոխքաղաքապետ Տիգրան Ավինյանը խոստանում է ամեն տարի մետրոյի նոր կայարան բացել։ Մեկ այլ թեկնածու էլ խոսում է տրանսպորտն անվճար դարձնելու մասին: Հնչում են նաև պոպուլիստական բնույթի այլ նմանատիպ խոստումներ։
Մինչդեռ, ըստ «Ժողովրդի ձայնը» փորձագիտական ակումբի հարցումների, մայրաքաղաքի բնակիչները շահագրգռված են ջրամատակարարման, աղբահանության, օդի աղտոտվածության աննախադեպ մակարդակի, փողոցները խցանումներից բեռնաթափելու հարցերով։ Երևանցիներին հետաքրքրում են նաև առողջապահության ոլորտին, մանկապարտեզների խնդրին վերաբերող հարցերը։
Նյութը հրապարակման պատրաստեց Կամո Խաչիկյանը
