Ադրբեջանում հաստատել են, որ արբանյակներ են օգտագործում Հայաստանին լրտեսելու համար

Ադրբեջանում փաստացի հաստատել են, որ արբանյակներ են օգտագործում Հայաստանին լրտեսելու համար։ Հանքարդյունաբերության ոլորտում նմանատիպ գործունեության արդյունքներին էր նվիրված «Հայաստանի Հանրապետության տարածքում արդյունահանվող հանքավայրերի տիեզերական մոնիթորինգի հաշվետվություն» միջոցառումը:

Հաշվետվության արդյունքների համաձայն՝ «Հայաստանի հանքարդյունաբերության գործունեությունը, որտեղ այսօր չեն պահպանվում բնապահպանական նորմերն ու չափանիշները, լուրջ վնաս է հասցնում շրջակա միջավայրին»։

«Ադրբեջանի մակերեւութային ջրային ռեսուրսների շուրջ 70 տոկոսը ձեւավորվել է հարեւան երկրներում անդրսահմանային ջրային հոսքերի հաշվին: Քանի որ Հայաստանն աշխարհագրորեն գտնվում է Ադրբեջանով հոսող գետերի ավազանում, նրա տարածքում իրականացվող ցանկացած հանքարդյունաբերական գործունեություն, անշուշտ, ազդում է մեր էկոլոգիայի վրա: Հայաստանը, որպես Espoo կոնվենցիայի անդամ, պետք է խորհրդակցի իր տարածքում իրականացվող որեւէ գործունեության վերաբերյալ եւ շատ դեպքերում ստանա Ադրբեջանի համաձայնությունը»,-ասվում է հաշվետվության դեմ։

Բաքվում մոռանում են, որ տարածաշրջանում այդ կոնվենցիայի ընդամենը երկու մասնակից կա, եւ երկրորդը հենց Ադրբեջանն է։ Այլ կերպ ասած, Հայաստանից հաշվետվություն պահանջելով, Ադրբեջանում պետք է պատրաստ լինեն պատասխան քայլերի եւ հաշվետու լինեն Երեւանին հայկական կողմին հետաքրքրող բոլոր ձեռնարկությունների վերաբերյալ։