«ՄԱԿ-ի Անվտանգության խորհրդին չհաջողվեց գնահատել Լաչինի միջանցքում տիրող իրավիճակը. իր օգտին բանաձևի ընդունման Երևանի ու Բաքվի հույսերը չարդարացան»
ՎԵՐԼՈՒԾՈՒԹՅՈՒՆՆԵՐ
Ng.ru-ն գրում է, որ տեղի է ունեցել Հայաստանի նախաձեռնած ՄԱԿ-ի Անվտանգության խորհրդի նիստը, որի ընթացքում քննարկվել է Լեռնային Ղարաբաղի իրավիճակը, որի բնակչությունն Ադրբեջանի կողմից Լաչինի միջանցքի փակման պատճառով շրջափակման մեջ է։ Բայց կոնսենսուս չի գտնվել, ուստի որոշումներ չեն ընդունվել։
Ադրբեջանի ԱԳՆ-ն Հայաստանին կոչ է արել «կառուցողական փոխգործակցել և դադարեցնել ՄԱԿ-ի Անվտանգության խորհրդի շահարկումն իր շահերից ելնելով»։ Երևանը նշել է, որ գլխավորը եղել է միջանցքը բացելու Բաքվին ուղղված միջազգային հանրության կոչը։ Ռուսական կողմն ընդգծել է բոլոր կողմերի տեսակետները հաշվի առնելու անհրաժեշտությունը, ինչպես նաև հումանիտար խնդիրների լուծման համար այլընտրանքային ուղիների օգտագործումը։
Հարավային Կովկասի քաղաքագիտական ակումբի ղեկավար Իլգար Վելիզադեն ng.ru-ին ասել է, որ ՄԱԿ-ի շրջանակներում որոշ բանաձևերի կամ փաստաթղթերի ընդունման միջոցով Ադրբեջանի վրա քաղաքական և դիվանագիտական ճնշում գործադրելու փորձերն արդարացված չեն, հատկապես, երբ բանակցային գործընթացն ակտիվ փուլում է: «Եթե հաշվի առնենք այն, որ բանակցային գործընթացի հիմնական մոդերատորները ՄԱԿ-ի Անվտանգության խորհրդի մշտական անդամ երկրներն են, ապա կարելի է հասկանալ նրանց դիրքորոշման բծախնդրությունը։ Նրանք հասկացրել են հայկական կողմին, ով նախաձեռնել էր այդ քննարկումը, որ իրենք չեն կարող կողմերից որևէ մեկի դիրքորոշումը որդեգրել»,- նշել է փորձագետը։ Նրա խոսքով, եթե մասնակիցների մեծամասնությունը պաշտպանել է հայկական կողմի դիրքորոշումը, ապա ՌԴ ներկայացուցիչն ուշադրություն է հրավիրել Բաքվի մտահոգության վրա, ինչը համապատասխանում է Ռուսաստանի որպես բանակցային գործընթացի գլխավոր մոդերատորներից մեկի դերին։ Նա ընդգծել է, որ մոդերատորը պետք է օբյեկտիվ լինի և հաշվի առնի բոլոր կողմերի տեսակետները։
«Վերջնական որոշումը չի կայացվել ոչ թե այն պատճառով, որ մոդերատորների՝ Ռուսաստանի և ԱՄՆ-ի միջև այս ճգնաժամի կարգավորման մոտեցումներում տարբերություններ կան, այլ այն պատճառով, որ դե ֆակտո Ռուսաստանի և ԱՄՆ-ի միջև առկա է բաց հակամարտություն, և երևի կողմերը չեն ցանկացել դա տեղափոխել այլ քաղաքական որոշումների վրա»,- ng.ru-ի հետ զրույցում ասել է քաղաքական դիտորդ Դավիթ Պետրոսյանը։ Նա ուշադրություն է հրավիրել այն փաստի վրա, որ ՄԱԿ-ի Անվտանգության խորհրդի նիստի մասնակիցների մեծ մասը կարծում է, որ Ադրբեջանի առաջարկած Աղդամ-Խանքենդի ճանապարհը չի կարող այլընտրանք լինել Լաչինի միջանցքին։ Դա նշանակում է, որ Լաչինի միջանցքի շրջափակումը կշարունակվի, և, հետևաբար, հումանիտար իրավիճակը Լեռնային Ղարաբաղում էլ ավելի կվատթարանա։ Եվ պատահական չէ, որ սկսում են հնչել կոչեր, որոնց իմաստն այն է, որ արցախահայությունը կանգնել է բարդ ընտրության առաջ. կամ թողնելով ամեն ինչ, հավաքական տարհանվել Հայաստան, կամ փորձել խնդիրը լուծել ուժով։
Նյութը հրապարակման պատրաստեց Կամո Խաչիկյանը
