Հայաստան - երկիր որին կարելի է սիրահարվել
ՄՇԱԿՈՒՅԹ
Sunnydreams.by-ը գրում է, որ պատկերացրեք, որ ամբողջ Հայաստանը փոքր է անգամ Մինսկի տարածաշրջանից։ Բայց որքա՜ն պատմական նշանակալի սկիզբներ են իրենց արմատները վերցրել այդ հինավուրց երկրից: Հայաստանի մայրաքաղաք Երևանն ավելի հին է, քան Հռոմը, և երկիրը մոլորակի վրա առաջինն է ընդունել քրիստոնեությունը որպես պետական կրոն: Այստեղ է գտնվում աշխարհի ամենահին գինեգործարանը, ամենահին կոշիկները ևս հայտնաբերվել են Հայաստանում, իսկ շախմատն այստեղ ներառված է դպրոցական պարտադիր ծրագրում։
Բելառուսները հիանալի հնարավորություն ունեն ծանոթանալու գեղեցիկ Հայաստանին։ Վիզա անհրաժեշտ չէ, կա ուղիղ չվերթ Մինսկից Երևան, անհրաժեշտ է միայն վավեր անձնագիր:
Այսպիսով, 13 հետաքրքիր փաստ այդ հրաշալի երկրի մասին.
1) Հայաստանի ներկայիս տարածքը 10 անգամ փոքր է պատմական հայկական թագավորությունից՝ Մեծ Հայքից, որը գոյություն է ունեցել Հայկական լեռնաշխարհում մ.թ.ա. 331-ից 428 թվականներին, այսինքն այդ երկիրը գոյատևել է հազարամյակներ, ինչպես Չինաստանը, Եգիպտոսը, Հունաստանը, Իրանը և Ճապոնիան:
2) Հայոց պաշտոնական կրոնը քրիստոնեությունն է։ Հայաստանն աշխարհում առաջին երկիրն էր, որն ընդունեց քրիստոնեությունը որպես պաշտոնական պետական կրոն 301 թվականին, և Հայաստանում կառուցվեց աշխարհի առաջին եկեղեցին։ Դա 12 տարի ավելի շուտ էր, քան հռոմեացիները։
3) Երևանը՝ Հայաստանի մայրաքաղաքն ու ամենամեծ քաղաքը, աշխարհի հնագույն քաղաքներից մեկն է։ Այն հիմնադրվել է մ.թ.ա 782 թվականին և մի քանի դար անվանվել Էրիվան։ Շատ ճանապարհորդների համար Երևանը թողնում է հավերժական հանգստի քաղաքի տպավորություն։ Թվում է, թե նրա բնակիչները չեն շտապում, այլ միայն հանգիստ զբոսնում են իրենց գործով, երբեմն մտնում են սրճարաններ ու ճաշարաններ։ Երևանը շրջապատված է Կովկասյան լեռներով և գտնվում է Արարատյան դաշտի հյուսիս-արևելքում։ Երևանի շենքերը կառուցված են հատուկ տեսակի քարից, որն ունի վարդագույն երանգ։ Զարմանալի չէ, որ այս քաղաքը կոչվում է «վարդագույն քաղաք»:
4) Հայկական եզակի այբուբենն ամենակատարյալներից մեկն է աշխարհում և անփոփոխ է մնացել ավելի քան մեկուկես հազար տարի։ Ինչպես հայտնի է, այն ստեղծվել է մեր թվարկության 5-րդ դարում հայտնի քրիստոնյա վանական-լուսավորիչ Մեսրոպ Մաշտոցի կողմից Սուրբ Գիրքը՝ Աստվածաշունչը հայերեն թարգմանելու համար։
5) 2014 թվականին հայկական հացը՝ լավաշը ներառվել է ՅՈՒՆԵՍԿՕ-ի ոչ նյութական ժառանգության մեջ:
6) Սևանա լիճը՝ Հայաստանի մարգարիտը մոլորակի ամենամեծ բարձրադիր լճերից մեկն է։ Այն շրջապատված է չորս լեռնաշղթաներով, ընկած է բնական թավուտի մեջ և օրական մի քանի անգամ փոխում է իր գույնը՝ մուգ կանաչից մինչև բաց կապույտ։
7) Բիբլիական Արարատ լեռը Հայաստանի խորհրդանիշն է։ Նա պատկերված է երկրի զինանշանի վրա։ Նոյն իր տապանի վրա իջել է Արարատ լեռան վրա համաշխարհային ջրհեղեղի ջրերի նվազումից հետո։ Սակայն 1921 թվականից լեռը գտնվում է ոչ թե Հայաստանի, այլ ժամանակակից Թուրքիայի տարածքում։ Հետաքրքիր է այն, որ երկրում էլ, որ լինեք, միշտ կտեսնեք Արարատ լեռը։
8) Ամենահին կոշիկները հայտնաբերվել են 2008 թվականի սեպտեմբերին Արենի գյուղում և դրանք ավելի քան 5500 տարեկան են։ Այն հիանալի պահպանվել է 45 սմ խորությամբ փոսի մեջ։
9) Աշխարհի ամենահին գինեգործարանը գտնվել է նույն Արենի գյուղում, որն այժմ հայտնի է իր գինիներով։ Ամեն տարի հոկտեմբերին տեղի է ունենում գինու ամենամյա փառատոն։
10) Հայկական կոնյակը սիրել են Ռուսաստանի կայսր Նիկոլայ II-ը և Անգլիայի վարչապետ Ուինսթոն Չերչիլը, ով ամեն օր խմում էր մեկ շիշ 50 աստիճանի հայկական «Դվին» կոնյակ։
11) Հայաստանը համարվում է ծիրանի ծննդավայրը, որը հին ժամանակներում կոչվում էր հայկական խնձոր, ինչը հաստատում է այն վարկածը, որ ծիրանը Հռոմ է բերվել Հայաստանից։ Հայկական հայտնի երաժշտական գործիքը՝ դուդուկը պատրաստվում է ծիրանի փայտից։
12) Աշխարհի ամենաերկար մարդատար ճոպանուղին՝ Տաթևերը, գտնվում է Հայաստանում։ Նրա երկարությունը 5752 մ է, և այն ներառված է Գինեսի ռեկորդների գրքում։
13) Հայաստանը շախմատային գերտերություն է: Շախմատը 2011 թվականից մտել է դպրոցական պարտադիր ուսումնական ծրագրի մեջ։ Շախմատը Հայաստանի միջազգային բրենդն է։
Ահա թե ինչու պետք է անպայման այցելել այդ երկիր, Հիանալ Արարատով, շփվել հնագույն պատմական ժառանգության հետ, լողալ լեգենդար Սևանա լճում, զբոսնել Երևան գողտրիկ «վարդագույն քաղաքում», վայելել հայկական խոհանոցն ու գինեգործությունը և, իհարկե, վայելել իսկական հայկական հյուրընկալությունը:
Նյութը հրապարակման պատրաստեց Կամո Խաչիկյանը
