Արկադին է սիրահետել Զարինեին, հետո ամուսնու վախից սպանել ընտանիքին

Շուրջ տասը ամիսների ընթացքում հանրությանն այդպես էլ պարզ չի դառնում, թե ինչ էր նոյեմբերի 9-ին Պեմզաշենում մոր և երկու անչափահաս երեխաների դաժան սպանության պատճառը։ 

Առաջին օրվանից տարբեր վարկածներ էին պտտվում, սկզբում ասում էին՝ հոգեկան շեղումներով մեկն է եղել, հետո երբ պարզվեցին մեղադրյալների ինքնությունը, արդեն, նշվում էր, որ պատճառը գողությունն էր։ Գյուղում, սակայն, 31-ամյա Զարինե Մելիքսեթյանի և նրա երկու անչափահաս երեխաների դաժան սպանությունների պատճառների մասին այլ կարծիք ունեն։ 

Մեղադրվող Արկադի ու Վրույր Բարսեղյանները հիմա կալանավորված են, գործի քննությունը չի ավարտվել, դատարան չի գնացել։ Արկադի Բարսեղյանը մինչև օրս իրեն առաջադրված մեղադրանքը չի ընդունում, ասում է՝ բացարձակ կապ չունի, վերջերս էլ հացադուլ էր հայտարարել՝ արդարություն պահանջելով։ 

MediaHub-ի տեղեկություններով՝ գյուղում վստահ են՝ սպանության «գլխավոր մեղավորը» հենց Արկադին է։ Արկադին սպանությունից 10 օր առաջ էր Ռուսաստանից եկել, մոտեցել է Զարինեին, սիրահետել, հետո փորձել սեռական ոտնձգության ենթարկել։ Կինը, բնականաբար, շատ կոպիտ է արձագանքել, ասել, որ ամուսնուն կպատմի, սակայն Արկադին այնքանով էր հանգիստ, որ Սևակը երկրում չի եղել։ Մեր աղբյուրի փոխանցմամբ՝ Զարինեն ամուսնուն այս ամենը չի պատմել, որովհետև մտածել է՝ Սևակը բոլոր ճանապարհներով կփորձի շուտ Հայաստան վերադառնալ, անհանգստացել է ամուսնու համար, որ չգա, փորձանքի մեջ չընկնի, սակայն Արկադիին շարունակ ասել է, թե ամեն ինչ պատմելու է ամուսնուն։ Մեղադրվող Արկադին էլ որոշել է Զարինեի «բերանը փակել» ու ազգականի՝ Վրույրի հետ մտել Մելիքսեթյանների տուն։ 

Վրույրը, բնականաբար, այլ պատմություն է պատմում՝ խճճելով ու շփոթեցնելով մարդկանց։ Հոկտեմբերին գործով առաջին դատական նիստն է, շատ դետալներ հենց այդ ժամանակ պարզ կդառնան։ Արկադին ու իր պաշտպանը անում են ամեն ինչ «չոր» դուրս գալու համար։

Հիշեցնենք, Շիրակի մարզի Պեմզաշեն համայնքում նոյեմբերի 9-ին 31-ամյա Զարինե Մելիքսեթյանի և նրա երկու անչափահաս երեխաների դաժան սպանությունների մեջ մեղադրվող ազգականներ Արկադի և Վրույր Բարսեղյանները կալանավորված են։ Սպանությունների գործը դեռ նախաքննության փուլում է։ 

Սպանության կասկածանքով նոյեմբերի 12-ին ձերբակալվել էր Շիրակի մարզի 32-ամյա բնակիչ Վրույր Բարսեղյանը, որը ոստիկանությունում ինքնախոստովանական ցուցմունք էր տվել՝ նշելով, որ սպանության օրն իր հետ է եղել նաև իր ազգական 36-ամյա Արկադի Բարսեղյանը։ Վերջինս իր մեղավորությունը չի ընդունում. նրա փաստաբանը MediaHub-ի հետ զրույցում ասել էր, որ հեշտ ապացուցելի է, որ այդ օրը իր պաշտպանյալն այլ վայրում է եղել։ 
Վրույր և Արկադի Բարսեղյանների կալանքը նախորդ ամիս ևս երկու ամսով երկարաձգել է։

Լիաննա Թորոսյան