Կոչ ենք անում՝ այն դատավորները, որոնք գործունեությունը չեն տեսնում Միությունում, լքել շարքերը. Դատավորների միություն
ՀԱՍԱՐԱԿՈՒԹՅՈՒՆ
Իրավասու մարմնի թողտվության հետեւանքով Միությունը, համակողմանիորեն անդրադառնալով եւ արձագանքելով դատական իշխանության եւ դատավորների անկախության առջեւ ծառացած մարտահրավերի, փաստացի իրականացնում է նաեւ գործառույթներ, որոնք ՀՀ Սահմանադրության եւ ՀՀ դատական օրենսգիրք սահմանադրական օրենքի կարգավորումներով վերապահված են հենց այդ մարմնին՝ Բարձրագույն դատական խորհուրդին։ Այս մասին հայտարարություն է տարածել ՀՀ դատավորների միությունը:
«Հարգելի՛ գործընկերներ,
ՀՀ դատավորների միությունը, որը անկախ հասարակական միավորում է, հիմնվել է դատավորների շահերի ընդհանրության, կամավոր անդամության եւ ինքնակառավարման սկզբունքներով, ստեղծվել է դատական իշխանությանն աջակցելու, դատավորների իրավունքների պաշտպանության, դատավորների անկախության եւ դատական իշխանության հեղինակության բարձրացման, անկախ դատական իշխանության առաքելության հանրային ընկալման մակարդակը բարձացնելու, դատական իշխանության եւ դատավորների նկատմամբ հասարակական վստահության ամրապնդման եւ հասարակությունում իրավունքի գերակայության երաշխավորման նպատակներով։
Իրավասու մարմնի թողտվության հետեւանքով Միությունը, համակողմանիորեն անդրադառնալով եւ արձագանքելով դատական իշխանության եւ դատավորների անկախության առջեւ ծառացած մարտահրավերի, փաստացի իրականացնում է նաեւ գործառույթներ, որոնք ՀՀ Սահմանադրության եւ ՀՀ դատական օրենսգիրք սահմանադրական օրենքի կարգավորումներով վերապահված են հենց այդ մարմնին՝ Բարձրագույն դատական խորհուրդին։
Վերահաստատում ենք՝ Միությունը շարունակելու է հավատարիմ մնալ իր առաքելությանը:
Միությանը կարող են անդամագրվել եւ նրա գործունեությանն իրենց մասնակցությամբ եւ աջակցությամբ նպաստել ինչպես գործող, այնպես էլ նախկին այն դատավորները, որոնք իրենց գործի նվիրյալներ են, գիտակցում են իրենց սահմանադրական առաքելությունն իրականացնելու ողջ նշանակությունը, միավորված են ընդհանրական այնպիսի գաղափարներով եւ նպատակներով, ինչպիսիք են՝ դատավորների եւ դատական իշխանության անկախության, հեղինակության պաշտպանությունը ու ամրապնդումը։
Միեւնույն ժամանակ կոչ ենք անում բոլոր այն դատավորներին, որոնք իրենց գործունեությունը չեն տեսնում Միության կանոնադրական տիրույթում, լքել մեր շարքերը՝ դրանով իսկ աջակցելով Միության ինքնամաքրմանը»:
