Քաղաքագետ. Հայաստանում «ճիշտ նույնը» կարող է լինել, ինչ Վրաստանում
ՎԵՐԼՈՒԾՈՒԹՅՈՒՆՆԵՐ
Radiosputnik.ria.ru-ն գրում է, որ ԱՄՆ Միջազգային զարգացման գործակալությունը (USAID) Հայաստանում ներկայացրել է դրամաշնորհային ծրագիր շահույթ չհետապնդող կազմակերպությունների համար, որի նպատակներն են ժողովրդավարական գործընթացների զարգացումը, և՛ կանանց, և՛ երիտասարդության նախագծերի աջակցությունը։ Դրամաշնորհների պոտենցիալ ստացողներ են համարվում այն կազմակերպությունները, որոնք պատրաստ են երկխոսություն հաստատել տեղական իշխանությունների հետ, մասնակցել խնդիրների բացահայտմանը, կապեր հաստատել կանանց համայնքների, երիտասարդության և «բնակչության մարգինալացված խմբերի» հետ:
Sputnik ռադիոյի եթերում Քաղաքական գիտությունների թեկնածու, Մոսկվայի մշակույթի պետական ինստիտուտի դոցենտ Արթուր Աթաևը հիշեցրել է, որ Հայաստանում հասարակական կազմակերպությունները վաղուց են արժանանում ԱՄՆ-ի և ԵՄ երկրների հատուկ ուշադրությանը։ «Բավական է հիշել, որ արդեն ուշ խորհրդային շրջանում դրա համար բավականին լուրջ միջոցներ են հատկացվել... 1989, 1990 թվականներին արդեն իսկ ստեղծվել են ոչ առևտրային կազմակերպություններ, որոնք ֆինանսավորում են ստացել Ֆրանսիայից, ԱՄՆ-ից, Գերմանիայից. երկրներ, որտեղ Հայկական սփյուռքի բաղադրիչն ուժեղ է»,- պարզաբանել է քաղաքագետը։
Հետխորհրդային շրջանում հայկական սփյուռքի ֆինանսավորմանն ավելացել են արևմտյան երկրների պետական և խոշոր մասնավոր կազմակերպությունների դրամաշնորհները, շարունակել է նա։ «Կազմակերպվել են Սորոսի հիմնադրամի, Մակ Արթուր հիմնադրամի, Copernicus և Tacis ծրագրերի ներկայացուցչությունները, դրանք Եվրամիության հիմնադրամներն են, ակտիվորեն աշխատել և շարունակում է աշխատել USAID ամերիկյան գործակալությունը: Հայաստանը Կովկասում ոչ առևտրային կազմակերպությունների աշխատանքի յուրօրինակ հիմք դարձնելու անուղղակի ապացույց է այն, որ Երևանում ԱՄՆ դեսպանատունը տարածքով երկրորդն է աշխարհում։ Այն շատ ակտիվ դիվանագիտական առաքելություն է, որը մի շարք նախաձեռնություններ է իրականացնում»,- հավելել է Աթաևը: Շատ հայ քաղաքական գործիչներ դուրս են եկել նույն ոչ առևտրային կազմակերպություններից, որոնք տասնամյակներ շարունակ ստացել և շարունակում են ստանալ արևմտյան դրամաշնորհներ, նշել է նա։ Հետևաբար, արևմտյան հիմնադրամների գործունեությունը սահմանափակելու ցանկացած փորձ Հայաստանում կբախվի շատ լուրջ դիմադրության և դժվար թե հաջողությամբ պսակվի, կարծիք է հայտնել Արթուր Աթաևը։
«Վրաստանում օտարերկրյա գործակալների մասին օրենք ընդունելու փորձը փողոց դուրս բերեց բավականին լուրջ բողոքի զանգված, կարծում եմ, որ ճիշտ նույնը կարող է լինել նաև Հայաստանում, քանի որ շահույթ չհետապնդող սեկտորը չափազանց ուժեղ է, և ունի ոչ պակաս հանրային ազդեցության ռեսուրս, քան իշխանությունը»,- ավարտել է քաղաքագետը։
Նյութը հրապարակման պատրաստեց Կամո Խաչիկյանը
