Ադրբեջանը համառորեն համոզում է Հնդկաստանին չիրականացնել Հայաստանի «ռազմականացում»
ՎԵՐԼՈՒԾՈՒԹՅՈՒՆՆԵՐ
Eadaily.com-ը գրում է, որ Հնդկաստանի կողմից Հայաստանին մահաբեր զենքի մատակարարումն այն պահին, երբ Ադրբեջանը խաղաղության համաձայնագրի շուրջ բանակցություններ է վարում հարևան երկրի հետ, ճանապարհ է բացում Հայաստանի ռազմականացման և իրավիճակի սրման համար, խոչընդոտներ է ստեղծում Հարավային Կովկաս կայուն խաղաղության և անվտանգության հաստատման համար: Նման հայտարարություններ է արել Ադրբեջանի նախագահի օգնական, հանրապետության ղեկավարի վարչակազմի արտաքին քաղաքականության բաժնի ղեկավար Հիքմեթ Հաջիևը Բաքվում Հնդկաստանի դեսպան Սրիդարան Մադհուսուդխանանի հետ հանդիպման ժամանակ։
«Դա նաև հակասում է Հնդկաստանի հռչակած արտաքին քաղաքականությանը, որը հիմնված է միջազգային իրավունքի նորմերի և սկզբունքների, ինչպես նաև Չմիավորման շարժման պատմական Բանդունգյան սկզբունքների վրա, որում ներկայացված է նաև այդ երկիրը», - ասել է Ադրբեջանի ղեկավարի վարչակազմի ներկայացուցիչը։
Հաջիևը Հնդկաստանի դեսպանին կոչ է արել պաշտոնական Դելիի ուշադրությունը հրավիրել ադրբեջանական կողմի «լուրջ անհանգստության» վրա և վերանայել Հնդկաստանի որոշումը Հայաստանին մահաբեր զենք մատակարարելու վերաբերյալ։ Ավելի վաղ Բաքվում Հնդկաստանի դեսպան Սրիդարան Մադհուսուդհանանի հավատարմագրերն ընդունելիս էլ Ադրբեջանի նախագահ Իլհամ Ալիևն ասել էր, որ ռևանշիստական ուժերը Հայաստանում գլուխ են բարձրացնում, մեր երկրի նկատմամբ տարածքային պահանջները շարունակվում են։
Նշելով, որ «Հայաստանի արագ սպառազինումը նոր վտանգներ է ստեղծում», պետության ղեկավարը նշել է, որ եթե Երևանն իսկապես խաղաղություն է ցանկանում Բաքվի հետ, ապա ինչու է հարյուր միլիոնավոր դոլարների զենքեր ձեռք բերում։ Ադրբեջանի նախագահն ընդգծել է, որ այդ քաղաքականությունը կարող է հանգեցնել «տարածաշրջանի համար նոր սպառնալիքների»։
Հիշեցնենք, որ Երևանի կապերը Նյու Դելիի հետ սկսել են ակտիվորեն ամրապնդվել 2020 թվականի աշնանը Ղարաբաղում 44-օրյա պատերազմի ավարտից հետո։ Վերջին երկուսուկես տարիների ընթացքում Հայաստանն ու Հնդկաստանն առանձնահատուկ առաջընթաց են գրանցել ռազմատեխնիկական համագործակցության, Անդրկովկասյան հանրապետության կողմից հնդկական արտադրության հարվածային և պաշտպանական համակարգերի գնման ոլորտում։
Հարկ է նշել, որ եթե հետևենք Ադրբեջանի ղեկավարության տրամաբանությանը, ապա Բաքուն ավելի մեծ չափով է «նոր վտանգներ ստեղծում տարածաշրջանի համար» իր ռազմականացման առումով։ Ադրբեջանը 44-օրյա պատերազմում ունեցած հաջողություններից հետո ոչ թե կրճատել, այլ ավելացրել է սպառազինության և ռազմական տեխնիկայի գնումները։ Դա է ակնհայտորեն վկայում երկրի պաշտպանական ծախսերի առաջանցիկ աճը։ Այս տարվա մայիսի վերջին հայտնի է դարձել, որ Ադրբեջանի կառավարությունը պաշտպանության և ազգային անվտանգության ծախսերն ավելացրել է 1 միլիարդ 105 միլիոն մանաթով (650 միլիոն դոլար), այդ թվում պաշտպանության հատուկ միջոցառումների և նախագծերի վրա ծախսերն ավելացել են 1 միլիարդ մանաթով (588 միլիոն դոլար): Ադրբեջանական բանակը կստանա նոր ժամանակակից սպառազինություն և զինտեխնիկա, անցյալ ամիս հայտարարել է պաշտպանության նախարար գեներալ-գնդապետ Զաքիր Հասանովը։ Ընդգծելով, որ պետության ղեկավար Իլհամ Ալիևը մեծ ուշադրություն է դարձնում և մշտական մտահոգություն է ցուցաբերում ադրբեջանական բանակի նկատմամբ, ռազմական գերատեսչության ղեկավարն այնուհետ նշել է, որ վերջերս լրացուցիչ 1 միլիարդ 105 միլիոն մանաթի հատկացումը երկրի պաշտպանունակության ամրապնդման համար է։
Նյութը հրապարակման պատրաստեց Կամո Խաչիկյանը
