Ի՞նչ առնչություն ունի Տեր-Պետրոսյանի եղբորորդին 41-ամյա կնոջ ինքնասպանության հետ. բացառիկ մանրամասներ

Shamshyan.com կայքն այսօր մի հոդված էր հրապարակել, որում նշվում է, թե Երևանում 41-ամյա կինը՝ Վարդուհի Սարոյանը մարտի 7-ին ինքնասպանություն է գործել։ Կայքի հրապարակման համաձայն՝ Վ. Սարոյանը ինքնասպանությունից առաջ նամակ է գրել հարազատներին՝ խնդրելով իր արարքի մեջ ոչ ոքի չմեղադրել։

Հոդվածի հեղինակը միևնույն ժամանակ նշում է, որ ինքնասպանություն գործած կինն ունեզրկվել է և դրա մեջ մեղադրել է առաջին նախագահ Լևոն Տեր-Պետրոսյանի եղբոր որդուն՝ Տիգրան Տեր-Պետրոսյանին, ինչպես նաև իր փեսային՝ քրոջ ամուսնուն՝ «Ելք» դաշինքից առաջադրված պատգամավորության թեկնածու Տիգրան Տեր-Մարգարյանին։

Ինչպես հայտնի է, Տիգրան Տեր-Պետրոսյանը գտնվում է հետախուզման մեջ, իսկ մահացած կնոջ փեսան՝ Տիգրան Տեր-Մարգարյանը «Առաջին լրատվական»-ի հետ զրույցում ասաց, որ ինքը ևս Տիգրան Տեր-Պետրոսյանի խարդավանքի զոհն է։

Մանրամասնելով՝ մեր զրուցակիցը պատմեց, որ Տիգրան Տեր-Պետրոսյանի հետ ապրել են նույն թաղամասում, բավականին լավ հարաբերություններ են ունեցել, ապա ընդդիմադիր քաղաքական հայացքները կիսելով, ավելի են մտերմացել՝ սկսած 2007 թվականից։

«2014 թվականին նրա կողմից համատեղ բիզնես սկսելու առաջարկ եղավ։ Տիգրան Տեր-Պետրոսյանը գիտեր, որ կինս անշարժ գույք ունի։ Նա ինձ ասաց, որ ինքն իր ամբողջ գույքն է դնում, ես էլ պետք է կնոջս ու քենուս հետ խոսեի՝ այսինքն երջանկահիշատակ Վարդուհու հետ, որ մեր գույքը դնենք։ Գնացինք, նստեցինք Տիգրանի հետ խոսեցինք ու եկանք ընդհանուր հայտարարի։ Դրանից հետո Տիգրան Տեր-Պետրոսյանն անընդհատ մեզ խաբում էր, ասում էր՝ բանկը գումարը չի հաստատել։ 600.000 դոլար է հաստատել, բայց ես այդ գումարը չեմ վերցնի՝ ինձ պետք է մեկ միլիոն դոլար, բանկում մարդ ուներ ծանոթ, որ պետք է դարձներ մեկ միլիոն դոլար։ Այդ ամեն ինչը ձգվեց վեց ամիս՝ Վարդուհին ասաց, որ ուզում է հանդիպել Տիգրանի հետ»։

Այդ ժամանակ Տեր-Պետրոսյանը եղել է Դուբայում, վերադառնալուց հետո հանդիպել է Վարդուհու հետ. « Վարդուհին ասաց՝ համաձայն չեմ, գույքս հանեք, Տիգրանն էլ պատասխանեց՝ խնդիր չկա։ Ինձ ասաց, որ գույքը պետք է ՎՏԲ-ից տեղափոխվի «Զարգացման բանկ», և եթե մենք չենք ուզում՝ պետք է գործից դուրս գանք։ Մենք գնացինք Տիգրանենց տուն՝ իր կնոջ Մադլենայի ներկայությամբ Վարդուհին ասաց՝ գույքը հանի տուր մեզ, նա պատասխանեց՝ «էս քանի օրը կհանեմ»։ Դրանից հետո անընդհատ ձգձգում էր, մի օր զանգում էի չէր վերցնում, հետո զանգում էի, Դուբայում էր։ 2015 թվականի հունվարի կեսերին հանդիպեցինք՝ ասաց մինչև ամսվա վերջ, կամ փետրվարի կեսերին «քեզնից կմաքրվեմ»․ նա նաև ինձ առձեռն գումար էր պարտք, ասաց՝ ամբողջը կվերադարձնեմ։ Անձնական խնդիրներով մեկնել եմ Մոսկվա, այնտեղից մի քանի անգամ խոսել եմ հետը, վերադառնալուց հետո էլ հանդիպել եմ՝ վերջին անգամ։ Հանդիպել եք Երևանում գիշերվա ժամը մեկին Զաքյան փողոցի վրա գտնվող «Կավկազսկայա պլեննիցա» ռեստորանում։ Դա եղել մեր վերջին հանդիպումը։ Նա ասաց՝ երկու օրից կտա։ Ես չգիտեի, որ այդ հանդիպումից հետո պատրաստվում է գնալ օդանավակայան»

Մեր զրուցակիցը հաջորդ օրը զանգահարել է Տիրան Տեր-Պետրոսյանին՝ հեռախոսն անջատված է եղել. «Ես գիտեի, որ նա փսորիազ հիվանդություն ունի, մտածեցի՝ վատացել է, գնացի իրենց տուն։ Իր մայրն ինձ նորմալ ընդունեց, հարցրեցի՝ ո՞ւր է Տիկոն, ասաց՝«թաղեմ Տիկոյի արևը, Տիկոն չկա, սաղ Տիկոյին են ման գալիս, լիքը մարդկանց փող է պարտք»։ Ասաց, որ գիշերը 3-ի կողմերը մտել է տուն, ճամպրուկը վերցրել ու գնացել։ Հետո իմացա, որ շատ այլ մարդկանց էլ է պարտք՝ անուններ չեմ տա, թող իրենք ասեն»։

Մեր զրուցակիցը պատմեց, որ մի քանի անարդյունավետ փորձեր են եղել գտնել Տիգրան Տեր-Պետրոսյանին՝ ընդհանուր ընկերոջ հաշվապահի միջոցով, սակայն, վերջինս, ինչպես հետագայում է պարզվել՝ ստել է ասելով, թե Տիգրան Տեր-Պետրոսյանին չի տեսել և հետը կապ չունի․ «Դրանից հետո նրա եղբայրը՝ Հակոբ Տեր-Պետրոսյանը բոլորի մոտ ասաց՝ ինձ էլ է քցել, ընկերներիցս փող է վերցրել ու քցել, հիմա ստիպված եմ տունս գրավ դնել ու այդ փողը մուծել»։

Մի քանի անգամ Տիգրան Տեր-Պետրոսյանը կապի է դուրս եկել, վայբերով մեր զրուցակցին գրել է. «Ինչ ես խառնվել իրար, կգամ փողերդ կտամ»։ Այդ նամակը մինչ այսօր պահպանված է,- «Առաջին լրատվական»-ին փոխանցեց Տիգրան Տեր-Մարգարյանը։

Ինչո՞ւ է Վարդուհի Սարոյանի ինքնասպանությունը կապվում նաև մեր զրուցակցի անվան հետ, Տիգրան Տեր-Մարգարյանն ասաց. «Պարզ ասեմ, մենք շատ լավ հարաբերություններ ենք ունեցել, անգամ Տեր-Պետրոսյանի կողմից քցվելուց հետո։ Բայց հետո Վարդուհի Սարոյանն ինձ ասաց՝ իր հետ կապվել է Տիգրան Տեր-Պետրոսյանի ընդտանիքի անդամներից ինչ որ մեկը, անուն չասաց, բայց իբր իրեն ասել՝ ես էլ եմ հավասարազոր այդ խաղի մեջ։ Ես էլ ասացի՝ չեմ կարող լինել խաղի մեջ, ես էլ եմ տուժող։ Բանկն առգրավվել է իմ մեքենան, երկու բնակարան եմ վաճառել։ Ասաց չէ՝ պնդում են իբր դու էլ ես մեղսակից։ Ասել եմ՝ գործ հարուցեք, ես պատրաստ եմ ցանկացած հարցի պատասխանել, ցանկացած ձևով ապացուցել և պատասխանատվություն կրել, բայց ես հարյուր տոկոս մեղավորություն չունեմ։ Ես օրենքի առաջ, մանավանդ Աստծո առաջ մաքուր եմ»։

Տիգրան Տեր-Մարգարյանն ասաց. «Վարդուհին միշտ ինքնասպանություններին դեմ է եղել, բնավորությամբ շատ ուժեղ մարդ էր։ Մի խոսք կա, ես չեմ սիրում, բայց նա տղամարդ կին էր։ Ես երբեք խնդիր չեմ ունեցել իր հետ, թշնամական հարաբերություններ բացարձակապես չեն եղել»։

Ի դեպ՝ մեր զրուցակիցը փորձել է կապվել նաև առաջին նախագահ Լևոն Տեր-Պետրոսյանի հետ խնդիրը լուծելու համար. «2008-ին եղել եմ նրա շտաբի անդամ, 2009 թվականին եղել եմ ՀԱԿ ցուցակով ավագանու թեկնածու։ Գնացի իր տուն, փորձեցի որպես մարդ, որ իր հետ ճանապարհ է անցել, խոսել, որ նա որպես մեծ խոսի, բայց նա բացարձակապես չցանկացավ որևէ բան ասել»։

Հիմա Վարդուհու մահվանից հետո ի հայտ է եկել մեկ այլ հանգամանք. «Սեպտեմբերին Վարդուհին կապվել է Մադլենա Տեր-Պետրոսյանի հետ, խոսք է տվել երկու օրվա ընթացքում հարցը լուծել, բայց այդպես էլ չի լուծվել ու արդյունքում եղավ այս դեպքը»։