Հայաստանում աճում է դժգոհությունը ռուս վերաբնակիչների նկատմամբ. «Հետ գնա կորի»
ՀԱՍԱՐԱԿՈՒԹՅՈՒՆ
Expert.ru-ն գրում է, որ մոբիլիզացիայի վախից Հայաստան փախած ռուսները ոչ մի կերպ չեն հայտնվել ընկերական միջավայրում։ Տեղացիները «այդ ռուսներին» մեղադրում են ապրանքների գների թանկացման և մասնավորապես բնակարանների վարձակալության և գնման թանկացման համար, հայտնել է Figaro-ն։
«Ռուսները, հատկապես ՏՏ ոլորտի մարդիկ, կարող են իրենց թույլ տալ վարձավճար վճարել, ինչպես Մոսկվայում կամ Բեռլինում: Եվ դրանից շահում են հայ տնատերերը։ Բայց մենք արժանապատիվ ապրելու հնարավորություն չունենք։ Մեր վարձավճարն ամսական 220 եվրոյից դարձել է 550 եվրո, և մենք առաջին անգամ տեղափոխվեցինք։ Այնուհետև նոր բարձրացումներ, մենք արդեն երեք անգամ տեղափոխվել ենք։ Արդյունքում ամբողջ ընտանիքը ամսական 150 եվրոյով տեղավորվել է ավտոտնակ»,- պատմել է 36-ամյա բուժքույր Փառանձեմ Վարդանյանը։
Ինչպես հրատարակությանը պատմել են տեղի բնակիչները, Երևանի անշարժ գույքի շուկայում գները կրկնապատկվել են և անգամ նույնիսկ եռապատկվել։ Հաճախ են սկսել լինել «ռուս ընտանիքի համար» բնակարան տրամադրելու գովազդներ։ Դա հայերին անմիջապես հիշեցրել է հետխորհրդային ժամանակները, երբ Ռուսաստանում նրանց հայրենակիցները բախվում էին իրենց վիրավորող գովազդի՝ «Բնակարան կտամ միայն սլավոններին»։ Երիտասարդ մոսկվացի Մատվեյը, ով Երևան է ժամանել 2022 թվականի մարտին, պատմել է, որ Մոսկվայում վարձակալության համար վճարել է 1500 եվրո, բայց այստեղ քաղաքի կենտրոնում ապրելու համար վճարում է 1700 եվրո։
Ըստ ֆրանսիական խմբագրականի ռուսաստանցիներից շատերը Հայաստանը համարում են մի տեսակ դարպաս, որտեղ նրանք կարող են հարմարավետ ապրել սպասելով դեպի Եվրոպա մուտքի արտոնագրի։ Այնուամենայնիվ, շատ տեղացիներ դա համարում են անհարգալից վերաբերմունք: «Մեզ մոտ գալիս են, մեզնից լավ են ապրում, ամեն տեղ ռուսերեն են խոսում։ Երբեմն նրանք իրենց շատ լկտիաբար են պահում, թեև կարող են ամաչել, որ իրենց պատճառով գները եռապատկվել են։ Նրանց համար այդ թանկացումը ոչինչ է, իսկ մեզ համար դա պարզապես մեր սովորական կյանքի կործանումն է»,- պատմել է երևանցի Տարոնը։
Երիտասարդ մոսկվացի Դանյան խոստովանել է, որ Հայաստանում իրեն այնքան էլ լավ ու ապահով չի զգում։ Հայ հասարակությունը, ըստ նրա, ավելի պահպանողական է, քան ռուսականը, նրան ամեն օր նկատողություններ են անում, հարցնում, թե ինչու՞ է այդպես հագնվում, ի՞նչ ականջօղ ունի ականջին, արդյունքում զրույցը հաճախ ավարտվում է. «Վերադարձեք ձեր Ռուսաստան» արտահայտությամբ:
Նյութը հրապարակման պատրաստեց Կամո Խաչիկյանը
