Կորցնելով Արցախը՝ կորցնելու ենք մեր ինքնությունն ու արժանապատվությունը. թեմակալ առաջնորդ
ՀԱՍԱՐԱԿՈՒԹՅՈՒՆ
Այսօր կանգնել Արցախի կողքին՝ կնշանակի կանգնել մեր խղճի և արդարության կողքին,կանգնել քաղաքակրթության և մարդու իրավունքների կողքին,հավատարիմ մնալ Աստծո պատգամներին:
«Արցախպրես»-ի հաղորդմամբ՝ այս մասին այսօր՝ հուլիսի 25-ին Ստեփանակերտում և Երևանում տեղի ունեցած համաժողովրդական հանրահավաքի ժամանակ ասել է Հայ Առաքելական եկեղեցու Արցախի թեմի առաջնորդ Տեր Վրթանես եպիսկոպոս Աբրահամյանը:
«Բոլորս էլ քաջատեղյակ ենք, թե ինչ է կատարվում Արցախում, ինչ խմորումներ են տեղի ունենում մեր հայրենիքի այդ սրբազան մասունքի շուրջ: Ինչպես ժամանակին Խրիմյան Հայրիկն էր բնութագրում՝ հայկական հարցը՝ ճիշտ նույն իրավիճակում ենք գտնում մենք. մի մեծ առևտուր է ընթանում, Արցախը դրված է վաճառքի,իսկ երկաթե շերեփավորներն ախորժակները սրած սպասում են իրենց պատառին: Որքան էլ խաղաղության սին հույսերի գինով հարբենք ու փորձենք մենք մեզ խաբել, դրանից իրականությունը չի փոխվի,և ինչպես խրոնիկ հարբեցողի դեպքում է լինում՝ ամեն ինչ գնալու է դեպի կործանում: Արցախը ենթակա չէ վաճառքի: Արցախը աստվածապարգև Հայաստան աշխարհի անմնացորդ մասն է: Արցախը սրբություն է: Արցախը պատմութուն է և ժողովուրդ է»,-ընդգծել է Սրբազան հայրը՝ հավելելով, որ Աստծո սիրո վրա հիմնված եղբայրասիրությունն ու հայրենասիրությունն են դառնալու այնքան անհրաժեշտ երկաթյա շերեփը:
«Այսօրվա իրականությունը գալիս է ևս մեկ անգամ մեզ հիշեցնելու,որ Արցախյան շարժումը չի ավարտվել և դեռ շարունակվում է: Այն մեզ համար պետք է դառնա հանապազօրյա հացի պես, դառնա ապրելակերպ, առաքելություն, գաղափար և պայքար: Արցախյան շարժման ընթացքին հազարավոր հայորդիներ հերոսացան,անմահացան և դարձան հզոր հոգևոր մի բանակ, որոնց հոգևոր հայացքի ներքո մենք չպիտի սխալվենք,այլ ամբողջ ազգով դառնալով մեկ միասնական բռունցք, այդ շարժումը հասցնենք իր բարի ավարտին՝ ազատ ,անկախ Արցախ:Այսօր Արցախն է հայի ինքնության և արժանաատվության շարժիչ ուժը: Կորցնելով Արցախը՝ կորցնելու ենք մեր ինքնությունն ու արժանապատվությունը»,-ասել է Տեր Վրթանես եպիսկոպոս Աբրահամյանը:
