Թուրքիան ԵՄ անդամ չի դառնա. Եվրահանձնաժողով

Եվրահանձնաժողովի խոսնակ Պիտեր Ստանոն «Իզվեստիային» ասել է, որ Թուրքիան 2024 թվականին չի դառնա Եվրամիության անդամ։ Նա նշել է, որ ԵՄ անդամակցության գործընթացը «տարիներ է պահանջում, ոչ թե ժամեր»։

Թուրքիան ԵՄ անդամակցության հայտ է ներկայացրել 1987 թվականին, իսկ թեկնածուի կարգավիճակ ստացել 1999 թվականին։ Անդամակցության բանակցությունները սկսվել են միայն 2005 թվականին։ Հարցի քննարկումը, ի թիվս այլ բաների, բարդացնում է թուրքական մի շարք օրենքներ, որոնք, ըստ Եվրամիության դիրքորոշման, խախտում են խոսքի ազատությունը։

Ստանոն նաև ասել է, որ Եվրամիությունը դեռ պատրաստ չէ Թուրքիային առանց վիզայի ռեժիմ տրամադրել։ «Վիզային ռեժիմի ազատականացման որոշումն ընդունվում է անդամ երկրների կողմից այն բանից հետո, երբ երկիրը կկատարի բոլոր անհրաժեշտ չափանիշները, որոնք ներառում են մարդու իրավունքները և քաղաքական ազատությունները»,- ասել է նա։

Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ Անկարան պատրաստ է շատ մոտ ապագայում համաձայնության գալ Շվեդիայի՝ ՆԱՏՕ-ին անդամակցելու հարցում, սակայն դրա դիմաց ցանկանում է ակտիվացնել Եվրամիությանը երկրի անդամակցության գործընթացը։ Ի պատասխան՝ ՆԱՏՕ-ն և ԵՄ-ն հայտարարեցին, որ Էրդողանի՝ այս երկու գործընթացները կապելու ցանկությունը տեղին չէ։

Ավելի ուշ ՆԱՏՕ-ի գլխավոր քարտուղար Յենս Ստոլտենբերգը հայտարարեց, որ Թուրքիան համաձայնել է հավանություն տալ Շվեդիայի անդամակցությանը դաշինքին։ Շվեդիան իր հերթին պարտավորվել է նպաստել Եվրամիությանը Թուրքիայի անդամակցությանը։

Կրեմլը կոչ է արել Թուրքիայի իշխանություններին «չկրել վարդագույն ակնոցներ» և հույս չունենալ ԵՄ անդամակցության վրա։