Երևանի ընտրությունները դերակատարում են ունենալու Հայաստանի ապագայի ճակատագրին

Երևանի ընտրությունները դերակատարում են ունենալու Հայաստանի ապագայի ճակատագրին։ «Ապրելու երկիր» կուսակցության նախագահ, Երևանի քաղքապետի թեկնածու Մանե Թանդիլյանն է այդ մասին նշել «Լրատվական ռադիո»-ի հետ զրույցում։

Թանդիլյանը նշում է, որ իրենք վճռական են տրամադրված, քանի որ սա կարևոր դերակատարում կունենա ամբողջ Հայաստանի համար: Սա պայքար է առանց թշնամանքի: Խնդիր կառաջանա այն ուժերի և այն մարդկանց հետ, որոնք կգնան թշնամու գծած ճանապարհով:

Նրա խոսքով, վերջին ժամանակներս յուրահատուկ «մոդա» է դարձել քննադատել ժողովրդին, որ այս չի անում, կամ այն չի անում, իբրև թե ճիշտ չի արձագանքում մարտահրավերներին։ «Կատեգորիկ սխալ մոտեցում է: Պետք է հաշվի առնել, որ այս նույն ժողովրդին բազմիցս մոլորեցրել են, պարզ ասած, խաբել են, և այդ առումով եղած արձագանքը տրամաբանական է և բնական»,- նշել է թեկնածուն:

Նա ընդգծել է, թե ժողովրդի հետ պետք է անկեղծ խոսել, բացատրել, հիմնավորել ու ռեալ այլընտրանք ցույց տալ: «Նաև՝ մարդիկ պետք է համոզվեն, որ իրենց վերաբերմունքն ապիկար իշխանությունների նկատմամբ ընտրություններում նրանց պատժելը պետք է լինի, որ դա է ամենաիրական և իրականանալի ճանապարհը հարցերի լուծման: Մենք այս ճանապարհով ենք գնում, և համոզված եմ՝ սա դեպի հաղթանակ տանող ճանապարհն է»,- նշել է Մանե Թանդիլյանը:

Ըստ Մանե Թանդիլյանի, ընտրությունները, թե՛ քաղաքային են, թե՛ քաղաքական, ուստի հարկավոր է ուշադրություն դարձնել երկուսին էլ, եթե ցանկանում են հաջողության հասնել։ «Բոլոր կոմպոնենտներն աշխատում են, և աշխատելու են»,- նշել է նա։ Ըստ Թանդիլյանի, ատելության մթնոլորտը պետք է հաղթահարել, գտնել լուծումները։ «Երբ ուզում ես թշնամական մթնոլորտ ձևավորել, կարող ես անել։ Հայ ժողովուրդն արժանի է որակյալ քաղաքական ուժի, քաղաքական թիմի, և այդ որակը քաղաքակրթական է։ Մարդիկ տեսնելու են, որ բոլոր քաղաքական ուժերն իրար նման չեն, տարբերություններ կան»,- նշել է թեկնածուն։ 

Գրետա Բաբայան