Զենք-զինամթերք պահելու կասկածանքով ձերբակալվածը նաև հետախուզվում էր

Ոստիկանության Արաբկիրի բաժնի և Երևան քաղաքի վարչության ծառայողները հունիսի 21-ին իրականացրած ուժեղացված ծառայության ընթացքում Վաղարշյան փողոցի 2-րդ նրբանցքում հայտնաբերել, ապօրինի զինամթերք, սառը զենք կրելու և պահելու հիմնավոր կասկածանքով ձերբակալել և Արաբկիրի բաժին էին տեղափոխել 48 և 34 տարեկան երկու տղամարդու՝ 34 տարեկանի «Մերսեդեսով» հանդերձ:

Ոստիկանությունից NEWS.am-ին հայտնում են, որ Արաբկիրի քրեական հետախույզների ձեռնարկած օպերատիվ-հետախուզական միջոցառումների շնորհիվ պարզվել է, որ 48-ամյա տղամարդը փետրվարի 14-ից հետախուզվում էր ՀՀ նախկին քրեական օրենսգրքի 325-րդ հոդվածի (Փաստաթղթեր, դրոշմներ, կնիքներ, ձևաթղթեր, տրանսպորտային միջոցների պետհամարանիշեր կեղծելը, իրացնելը կամ օգտագործելը) մեղադրանքով:

Նրա անձնական խուզարկությամբ հայտնաբերվել են գաղտնի փականով 3 դանակ՝ 23 սմ, 12 սմ և 8,5 սմ երկարությամբ, 5 պարկուճ, «ԲՌՄ 75» գրառումով նռնակ, ինքնաձիգի դատարկ պահեստատուփ, ռադիոկապ, լուսարձակող սարք, ինչպես զինվորական կտորե պայուսակ, որի մեջ զինվորական հագուստներ էին:

Ձերբակալված տղամարդիկ և կազմված փաստաթղթերը ներկայացվել են Արաբկիրի քննչական բաժին: