Հումանիտար իրադրությունը ԼՂ-ում շարունակում է սրվել. ամեն ինչ արվում է հայերի կյանքը անհնար դարձնելու համար. Փաշինյան
ՔԱՂԱՔԱԿԱՆՈՒԹՅՈՒՆՀումանիտար իրադրությունը ԼՂ-ում շարունակում է սրվել. Լաչինի միջանցքի ապօրինի արգելափակումը շարունակվում է ի հեճուկս արդարադատության միջազգային դատարանի փետրվարի 22-ին կայացված միջանկյալ որոշման: Այս մասին այսօր՝ հունիսի 22-ին, կառավարության նիստում հայտարարեց վարչապետ Նիկոլ Փաշինյանը:
«Հիշեցնեմ, որ պարտադիր իրավական ուժ ունեցող որոշմամբ դատարանն Ադրբեջանին պարտավորեցրեց ձեռնարկել իրեն հասու բոլոր միջոցները երաշխվորելու Լաչինի միջանցքով քաղաքացիների, տրանսպորտային միջոցների եւ բեռների երկու ուղղություններով անխափան տեղաշարժը: Դատարանը շեշտել է, որ իր որոշումը պարտադիր իրավական ուժ է առաջացնում Ադրբեջանի համար:
Դատարանի այս որոշումը չի կատարվում, Լաչինի միջանցքով չեն շարժվում ոչ քաղաքացիներ, ոչ տրանսպորտային միջոցներ, ոչ բեռներ: Ավելին, արգելվել են նաեւ Կարմիր խաչի մեքենաների երթեւեկությունը: Սրանք կարեւոր փաստեր են, որոնք իրենք իրենցով հակադարձում են Ադրբեջանի այն փաստարկներին, թե ԼՂ-ում եւ Լաչինի միջանցքում ստեղծված իրավիճակի մասին բարձրաձայնող ուժերը, երկրները, իբր միջամտում են Ադրբեջանի ներքին գործերին:
Արդարադատության միջազգային դատարանի որոշումը չկատարելը եւ դատարանի որոշման կատարման ապահովումը միջազգային օրակարգի հիմնահարց է ու խնդրին պետք է մոտնեալ այս տրամաբանությամբ։ Կարեւոր է արձանագրել, որ այդ որոշման չկատարումն ու արհամարումը բերել է հումանիտար ճգնաժամի»,- հայտարարեց վարչապետը։
Նա հավելեց, որ որ ամեն ինչ արվում է՝ հայերի կյանքը Լեռնային Ղարաբաղում անհնար դարձնելու համար. հենց սա է էթնիկ զտման քաղաքականությունը, որի մասին տարիներ շարունակ Հայաստանն ահազանգում է։
«Այս իրադրության լուծման մեր պատկերացումը հետեւյալն է. Արդարադատության միջազգային դատարանի փետրվարի 22-ի իրավական ուժ ունեցող որոշումը պետք է կատարվի եւ սա միջազգային օրակարգի հարց է, ներառյալ ՄԱԿ-ի Անվտանգության խորհրդի հարց, որովհետեւ հենց այս մարմինն է լիազորված ապահովելու Արդարադատության միջազգային դատարանի որոշումների կատարումը»,-ընդգծեց ՀՀ վարչապետը:
