Ոստիկանության Մալաթիայի բաժինը Սամվել Ալեքսանյանի անձնական օգտագործման բաժի՞նն է․ Փաշինյան

Ազգային ժողովի ՀԱԿ խմբակցության պատգամավոր Նիկոլ Փաշինյանը պահանջում է քննություն անցկացնել մամուլի այն հրապարակման վերաբերյալ, որի համաձայն՝ ՀՀԿ-ական պատգամավոր Սամվել Ալեքսանյանը մարդ է առեւանգել եւ ահաբեկել։

«Ես պահանջում եմ Հատուկ քննչական ծառայությունից լուրջ քննություն իրականացնել եւ պարզել, թե ինչ է տեղի ունեցել։ Բացի դրանից, պետք է լուրջ քննություն իրականացվի ոստիկանության Մալաթիա- Սեբաստիայի բաժնի աշխատակիցների գործողությունների հետ կապված՝ պարզելու համար, թե դա Հայաստանի Հանրապետության ոստիկանության բաժին է, թե Սամվել Ալեքսանյանի անձնական օգտագործման բաժինն է»,- այսօր՝ հունիսի 16-ին, ԱԺ-ում ասաց Նիկոլ Փաշինյանը։

Նշենք, որ ըստ «Հայկական ժամանակ» թերթի՝ ՀՀ ԱԺ պատգամավոր Սամվել Ալեքսանյանի նախկին աշխատակից Արմեն Իսրայելյանը, որը 2002 թվականից աշխատել է պատգամավորին պատկանող ընկերություններից մեկում, պնդում է, որ Ալեքսանյանն իրեն ունեցվածքից զրկել է՝ տիրանալով իր ընտանեկան բիզնեսներին:

Արմեն Իսրայելյանը պատմում է, որ 2015 թվականին խնդիրներ է ունեցել պատգամավորի հետ այն բանի համար, որ տեղյակ է եղել, որ Սամվել Ալեքսանյանի քեռու տղայի՝ Սամվել Ղազարյանի, խաղատներ այցելելու հակումի մասին, պատգամավորին տեղյակ չի պահել: Սամվել Ալեքսանյանը տեղեկանալով, որ Արմեն Իսրայելյանն ու այլ աշխատակիցներ իրենից թաքցրել են այդ փաստը, որոշել է տուգանել նրանց՝ յուրաքանչյուրից պահանջելով 60 հազար ԱՄՆ դոլար: