Հնագետները հայկական հին մայրաքաղաք Դվինում արժեքավոր արտեֆակտներ են հայտնաբերել
ՄՇԱԿՈՒՅԹ
Mir24.tv–ն գրում է, որ Հայաստանի հին մայրաքաղաք Դվինի տարածքում հնագետները բազմաթիվ արտեֆակտներ են հայտնաբերել։ Պեղումների ավարտից հետո նախատեսում են այնտեղ պատմահնագիտական թանգարան կառուցել։ Հնությունները զննել է MIR 24-ի թղթակից Արմեն Օսիպյանցը։
Դվինը Մեծ Հայքի նախկին մայրաքաղաքն է, որը հիմնադրել է 4-րդ դարի առաջին կեսին Խոսրով Արշակունի թագավորը։ «Դվին» պատմահնագիտական արգելոցի մոտ այժմ պեղումներ են ընթանում։ 2,5 մետր խորության վրա արշավախումբը մեծ շինություն է հայտնաբերել։ Հնագետները ենթադրում են, որ այնտեղ եղել է քաղաքաբնակների բնակելի համալիր։
«Եթե նայեք պեղումներին, կտեսնեք սենյակներ, հատակներ, պատեր։ Դվինի ողջ խնդիրն այն է, որ նրա պատերը ցեխե աղյուսից են եղել, ուստի այն բավականին դժվար է պեղել։ Հատկապես, երբ անձրև է գալիս, մենք պետք է շատ զգույշ իջնենք, որպեսզի չքանդենք պատերը»,- ասել է Հայկական ուսումնասիրությունների ինստիտուտի հնագիտության լաբորատորիայի ավագ գիտաշխատող Տատյանա Վարդանեսովան։
Հնագետները բազմաթիվ արտեֆակտներ են հայտնաբերել։ Հիմնականում դրանք հազարավոր բեկորներ են և մոտ երկու տասնյակ գրեթե ամբողջությամբ պահպանված խեցեղեն։ Գտածոների առանձնահատուկ արժեքն այն է, որ դրանք թվագրվում են 9-րդ դարով, երբ Դվինում երկրաշարժ է տեղի ունեցել, սակայն արտեֆակտները պահպանվել են։
«Գտել ենք ապակյա և ճենապակե անոթներ, մետաղական իրեր, խաչ։ Լաբորատոր հետազոտություններից և վերականգնումից հետո գտածոները կտեղափոխվեն Հայաստանի պատմության թանգարան։ Հետագայում մի մասը կդառնա նոր հնագիտական թանգարանի էքսպոզիցիա, որը կկառուցվի ընթացող պեղումների տարածքում»,- ասել է Հնագիտության և ազգագրության ինստիտուտի ասպիրանտ Համազասպ Աբրահամյանը։
Հնագետները նախատեսում են աշխատանքները ավարտել մինչև ամսվա վերջ։ Դա ծրագրի երկրորդ փուլն է։ 2021 թվականին այստեղ վերականգնվել են ամրությունները և թարմացվել Դվինի պատմական տեսքը։ Վերջնական փուլը կլինի թանգարանի ստեղծումը, որը կլինի գիտական, մշակութային և զբոսաշրջային կենտրոն։
Նյութը հրապարակման պատրաստեց Կամո Խաչիկյանը
