Գյումրիում անցկացվել է միջազգային թատերական փառատոն. ի՞նչն է զարմացրել հանդիսատեսին
ՎԵՐԼՈՒԾՈՒԹՅՈՒՆՆԵՐ
Mir24.tv-ն գրում է, որ Հայաստանի Գյումրի քաղաքում անցկացվել է միջազգային թատերական փառատոն։ Երկու շաբաթ շարունակ ամեն օր բեմում հանդիսատեսը դիտել է տարբեր ժանրերի ներկայացումներ։ Մեկ օր թատրոնում է անցկացրել նաև МИР 24-ի Երևանի թղթակից Նոնա Հովհաննիսյանը։
Բեմում երկխոսություններ են Վրթանես Փափազյանի «Ժայռը» դրամայից։ Այդ ներկայացումը միջազգային փառատոն է բերվել Հայաստանի հարավային Կապան քաղաքից։ Ալեքսանդր Շիրվանզադեի անվան դրամատիկական թատրոնի թատերախումբն իր գոյության գրեթե 90 տարիների ընթացքում առաջին անգամ է հանդես գալիս Գյումրու բեմում։
«Մեր պատվիրակության կազմում 30-ից ավելի մարդ կա։ Փառատոնին մենք ծանոթանում ենք միմյանց հետ, շփվում, աշխատում և, իհարկե, սովորում մեր գործընկերների փորձը։ Մենք արդեն նախանշել ենք, թե ինչ նորամուծություններ ենք անելու մեր թատրոնում»,- ասել է Կապանի Ա.Շիրվանզադեի անվան դրամատիկական թատրոնի տնօրեն Տիգրան Աթայանը։
Երկու շաբաթ շարունակ հանդիսատեսը տեսել է Հայաստանի, Ռուսաստանի, Իրանի և եվրոպական երկրների թատերական կյանքի պատկերները։ Այստեղ՝ բեմում են եղել թե՛ սկսնակ դերասանները, թե՛ մշակույթի վաստակավոր գործիչները։ Յուրաքանչյուր թատերախումբ ունի իր ստեղծագործական փիլիսոփայությունը:
«Մենք շոշափում ենք հարցեր, որոնք արդիական են բոլոր ժամանակներում: Դրանք են մարդկային հարաբերությունները, սերը, ճշմարտությունն ու սուտը, պատմություններ աղքատների և հարուստների մասին: Մի բան, որը ռեզոնանս է ունենում հեռուստադիտողի մոտ»,- ասել է ՀՀ վաստակավոր արտիստ Արթուր Կարապետյանը։
Իսկ Իրանից ժամանած մասնակից Արադ Էնթեզարին հանդես է եկել մոնոներկայացմամբ։ 22 տարեկանում նա ոչ միայն խաղում է թատրոնում, այլ նաև նկարահանվում է ֆիլմերում։ Միջազգային փառատոնի բեմից նա որոշել է խոսել այն մարդկանց մասին, ովքեր բախվում են կախվածություններին: «Ուզում եմ ցույց տալ այն ամբողջ ցավը, որը մարդը զգում է, երբ մենակ է մնում կախվածությունից: Ուզում եմ մարդկանց փոխանցել, որ դուք պետք է ուժ գտնեք ձեր մեջ, նույնիսկ երբ թվում է, թե ուժերը լքել են ձեզ, և առաջին քայլն անեք կապանքներից ազատվելու համար»,- պատմել է դերասան, փառատոնի մասնակից իրանցի Արադ Էնթեզարը։
Փառատոնի հրավեր ստանալու համար մասնակիցները պետք է անցնեին մի քանի փուլ։ «Ընտրությունը խիստ էր: Ներկայացրինք դերասանին, նրա մասնագիտական գործունեությունը հայրենի երկրում, ինչպես նաև պատմեցինք, թե որտեղ է նա խաղում, ինչ է ցանկանում ցուցադրել այս փառատոնին»,- պարզաբանել է պրոդյուսեր Լիլիթ Մովսիսյանը։
Փառատոնի ներկայացումներում հանդես են եկել 500 դերասաններ և թատերական ոլորտի ներկայացուցիչներ։ Երկու շաբաթվա ընթացքում հանդիսատեսների թիվը գերազանցել է տասը հազարը։ Ընդհանուր առմամբ փառատոնին մասնակցել են երկու տասնյակից ավելի թատերախմբեր տարբեր երկրներից։
Նյութը հրապարակման պատրաստեց Կամո Խաչիկյանը
