Մենք մեջը նստած, ծախել են շենքը. Երևանում փախստականները 26 տարի է ապրում են անմարդկային պայմաններում
ՀԱՍԱՐԱԿՈՒԹՅՈՒՆ
Երեւանի Սեբաստիա 3ա հասցեում բնակվող փախստականները 26 տարի է ապրում են, ինչպես իրենք են բնորոշում, անմարդկային պայմաններում: Երկու տասնյակ բնակիչներն այսօր՝ հունիսի 16-ին, հավաքվել են Կառավարության շենքի մոտ իրենց բողոքը հայտնելու:
«Նախկին լաբորատորիայի տարածք է: Ոչ զուգարան կա, ոչ բաղնիք: Ինչ-որ ապակիներով բաժանված սենյակներում ենք ապրում, 27 քմ տարածքում, երեխա չենք կարողանում ամուսնացնենք»,- NEWS.am-ին ասաց բնակիչներից մեկը:
Փախստականների խոսքով 2003թ. շենքը վաճառվել է Մխիթար Գոշ համալսարանին՝ պայմանով, որ եթե նրանց հանեն այդտեղից, պետք է ապահովեն տնով. «Մենք մեջը ծախել են շենքը: Ո՞վ է տեսել նման բան: Հիմա էլ սեփականատերը մնացած բնակարանները վերանորոգում է, մենք մնացել ենք: Ինքը չի հանում, պետությունն էլ մեր հարցը չի լուծում: Բայց ինչքան կլինի այդպես: Տարիներ շարունակ գումարներ են ուղարկվում փախստականների համար, գնում ենք Միգրացիոն ծառայության պետի մոտ, ասում է՝ այդ գումարները տարբեր ծրագրերում են ներդրվում, բայց մենք ոչ մի ծրագրից էլ չենք օգտվում: Էդ հոնորարներով իրանց տներն են սարքում»:
Բնակիչները նշեցին, որ տարիներ շարունակ դիմել են պատկան մարմիներին, սակայն անօգուտ. «Մեզ քաղաքապետարանից ասում են՝ ինչի չեք գնում Ռուսաստան, ով գնացել ա, ապահովված ա»:
