Քաղաքագետ Կոսորուկով. Հայաստանը չի պայքարի Լեռնային Ղարաբաղի անկախության համար
ՎԵՐԼՈՒԾՈՒԹՅՈՒՆՆԵՐ
Riamo.ru-ն գրում է, որ հայ-ադրբեջանական սահմանին տիրող լարված իրավիճակի համատեքստում Հայաստանի վարչապետ Նիկոլ Փաշինյանի համար ձեռնտու է սահմանել «կարմիր գծեր», որոնք չեն կարող անցնել, մասնավորապես, դրանք Հայաստանի և Ադրբեջանի սահմաններն են Խորհրդային Միությունից անջատման պահին։ Այս մասին ասել է Մոսկվայի Մ.Վ.Լոմոնոսովի անվան պետական համալսարանի քաղաքագետ Արտեմ Կոսորուկովը։
«Եթե Փաշինյանին հաջողվի հասնել դրան, ապա Հայաստանի տարածքային ամբողջականությունը կապահովվի, և Ադրբեջանը չի կարողանա, օրինակ, Թուրքիայի օգնությամբ լոբբինգ անել Զանգեզուրի միջանցքի կառուցման համար, այսինքն Հայաստանի տարածքով»,- պարզաբանել է փորձագետը։
Նա նաև հավելել է, որ 1991 թվականը, երբ երկրները լքեցին ԽՍՀՄ-ը, վերջնական մեկնարկային կետը չէ։ Կոսորուկովը հիշեցրել է 1988 թվականը, երբ Հայկական ԽՍՀ խորհրդարանը քվեարկել է Լեռնային Ղարաբաղի Հանրապետությունը Հայաստանի կազմում ընդգրկելու օգտին։ Փաշինյանի համար սա ժամանակավոր միջոց է հասնել 1991 թվականի սահմաններում Հայաստանի տարածքային ամբողջականության ճանաչմանը։ Փորձագետը կարծում է, որ նա կարող է հետագայում էլ միջազգային ճնշում գործադրել Ադրբեջանի վրա Լեռնային Ղարաբաղում ազգային և մշակութային ինքնավարություն ապահովելու համար, որպեսզի պաշտպանի հայ բնակչությանը։
«Ավելին, Փաշինյանի համար կարևոր է, որ դա անի հենց Արևմուտքի ջանքերով՝ առանց Ռուսաստանի կամ նրա նվազագույն մասնակցությամբ»,- կարծիք է հայտնել քաղաքագետը։
Նա նշել է, որ Կրեմլի համար ձեռնտու է Լեռնային Ղարաբաղում ունենալ ռուս խաղաղապահներ, քանի դեռ չեն երաշխավորվել տեղի հայ բնակչության մարդասիրական իրավունքները։ Ընդ որում Ռուսաստանն ընդգծում է, որ ճանաչում է Հայաստանի և Ադրբեջանի Հանրապետությունները 1991 թվականի սահմաններում։
Կոսորուկովը հիշեցրել է, որ Հայաստանը չի ճանաչում Լեռնային Ղարաբաղի անկախությունը, հետևաբար պաշտոնապես չի պայքարելու դրա համար։
«Սա նաև հարց է Փաշինյանին. ինչո՞ւ նա չճանաչեց Լեռնային Ղարաբաղի անկախությունը, եթե այդքան ակտիվորեն պաշտպանում է Հայաստանի շահերը։ Դժվար թե Ռուսաստանը դա անի ու այս հարցում նա Հայաստանից առաջ չի ընկնի, առավել ևս, որ դա ձեռնտու չէ Ռուսաստանին։ Ռուսաստանին առավել ձեռնտու է Անդրկովկասում ստատուս քվոյի հավասարակշռության պահպանումը»,- ասել է քաղաքագետը։
Նա հավելել է, որ եթե հակամարտությունը սրվի, ապա փախստականներ կլինեն, և դա խնդիր է դառնալու, քանի որ կողմերից ոչ մեկը չի ցանկանում, որ որևէ տարածքում տարբեր համայնքների գոյատևեն և նրանց որոշ հատուկ կարգավիճակ շնորհվի։
Ավելի վաղ Հայաստանի վարչապետ Նիկոլ Փաշինյանը հայտարարել էր, որ Հայաստանը ճանաչում է Ադրբեջանի տարածքային ամբողջականությունը և Բաքվից ակնկալում է նմանատիպ դիրքորոշում։
Նյութը հրապարակման պատրաստեց Կամո Խաչիկյանը
