«Դիտորդական առաքելություն և «այլընտրանքային» գազ. Բրյուսելը չի ցանկանում զայրացնել Բաքվին»
ՎԵՐԼՈՒԾՈՒԹՅՈՒՆՆԵՐ
Eadaily.com–ը գրում է, որ Բրյուսելը Բաքվին տեղեկատվություն է փոխանցում Հայաստանի և Ադրբեջանի միջև սահմանին իր հսկողության մասին: Այդ մասին հայտնել է Politico հրատարակությունը հղում անելով Եվրամիության դիվանագիտական ծառայության իր բարձրաստիճան աղբյուրին։ Նրա խոսքով, ԵՄ-ն հույս ուներ «Բաքվի հետ այլ սցենարի», երբ նրանք որոշում կայացրին իրենց դիտորդական առաքելությունը տեղակայել տարածաշրջանում։ «Մենք Ադրբեջանի հետ կիսում ենք պարեկության մասին բոլոր համապատասխան տեղեկություններով, քանի որ չենք ցանկանում որևէ խնդիր ստեղծել նրանց հետ», - ասել է ամերիկյան հրատարակության աղբյուրը։
ԵՄ-ում ադրբեջանական պատվիրակության ղեկավար Վագիֆ Սադիգովն իր հերթին Politico-ին ասել է, որ իր երկրի հետ սահմանի մոտ ԵՄ առաքելության ներկայությունը Բաքվում անհանգստություն է առաջացնում։ «Դա տեղի է ունենում մեր իսկ սահմանային կետերից մի քանի հարյուր մետր հեռավորության վրա և խիստ ռազմականացված գոտում, որտեղ կան ռուս սահմանապահներ, հայ սահմանապահներ, ռուսական կանոնավոր ստորաբաժանումներ, հայկական կանոնավոր ստորաբաժանումներ, իսկ Իրանի սահմանին ավելի մոտ՝ իրանցի զինվորականներ»,– ասել է Սադիգովը: Նրա կարծիքով, այդ առաքելությունը կարելի է դիտել «որպես Բրյուսելի փորձ ուժեղացնելու իր ներկայությունը Հարավային Կովկասի տարածաշրջանում»։
ԵՄ քաղաքացիական առաքելությանը Բաքվում նախապաշարմունքով են վերաբերվում։ Միաժամանակ Ադրբեջանում մարդու իրավունքների խախտումները դատապարտող Եվրախորհրդարանի զեկույցը վրդովմունք է առաջացրել այդ երկրում։ Այս ամենը ստվեր է գցել Բաքվի հետ Բրյուսելի աղմկահարույց գործարքի վրա, որն է մինչև 2027 թվականը կասպյան գազի տարեկան մատակարարումները եվրոպական շուկա կրկնապատկել մինչև 20 միլիարդ խորանարդ մետրի։
«Carnegie Europe» վերլուծական կենտրոնի ավագ գիտաշխատող Թոմաս դե Վաալը Politico-ին ասել է, որ Բրյուսելը դեռ հույսեր է փայփայում, որ կարող է միջնորդ լինել Ադրբեջանի և Հայաստանի միջև հակամարտությունը, որն աշխարհի ամենաձգձգվող վեճերից մեկն է, ԵՄ-ն փորձում է վերսկսել խաղաղության գործընթացը։ Բայց եթե այդ ջանքերը ձախողվեն, զգուշացրել է նա, ապա Արևմուտքի կողմից Ադրբեջանի դեմ պատժամիջոցներ կիրառելու կոչերը կարող են ակտիվանալ, ինչը կարող է խնդիրներ առաջացնել Հարավային Կովկասի խոշորագույն տնտեսության գազային ռեսուրսները որպես ռուսական հանածո վառելիքի «այլընտրանք» օգտագործելու ԵՄ ջանքերի համար:
Ռուսաստանն իր հերթին հետևողականորեն քննադատում է հայ-ադրբեջանական սահմանին ԵՄ երկարաժամկետ առաքելությունը։ Այսպես, ՌԴ ԱԳՆ պաշտոնական ներկայացուցիչ Մարիա Զախարովան «կոպտություն» է անվանել Անդրկովկաս ներթափանցելու Արևմուտքի փորձերը։ Նրա խոսքով, այդ քաղաքականությունն իրականացվում է ոչ թե հակամարտությունը կարգավորելու, այլ «ճիշտ հակառակ նպատակներով»։
Նյութը հրապարակման պատրաստեց Կամո Խաչիկյանը
