Պետդուման հետաձգել է Ռուսաստանում Հայաստանի վարորդական իրավունքը ճանաչելու մասին նախագծի քննարկումը
ՔԱՂԱՔԱԿԱՆՈՒԹՅՈՒՆ
Պետդուման, երկրորդ ընթերցմամբ քննարկելիս մինչեւ մարտի 21-ը հետաձգել է այն օրինագծի քննարկումը, որը նախատեսում է Ռուսաստանում ճանաչել Հայաստանի քաղաքացիների վարորդական վկայականները՝ ձեռնարկատիրական եւ աշխատանքային գործունեություն իրականացնելիս, հայտնում է «ՌԻԱ Նովոստին»։
Փաստաթուղթը նախատեսում է Ռուսաստանի Դաշնության տարածքում Հայաստանի քաղաքացիների ազգային վարորդական վկայականների ճանաչում տրանսպորտային միջոցներ վարելու հետ կապված ձեռնարկատիրական եւ աշխատանքային գործունեություն իրականացնելիս, ասվում է կառավարության ներկայացրած օրինագծի բացատրական գրության մեջ։
Պալատի նախագահ Վյաչեսլավ Վոլոդինն առաջարկել է օրինագիծը քննարկելու համար ԱԳՆ եւ ՆԳՆ ներկայացուցիչների հրավիրել, ինչպես նաեւ այս հարցի քննարկմանը նախապատրաստվել ԱՊՀ հարցերով հանձնաժողովի ներկայացուցիչներին, որը համագործակցում է Հայաստանից գործընկերների հետ։
«Այդ հարցը քննարկել Հայաստանի խորհրդարանի հետ մեր հաղորդակցության շրջանակներում… Ոչինչ չի լինի, եթե քննարկումը հետաձգենք հաջորդ շաբաթ՝ ամսի 21-ին, ի՞նչ եք կարծում։ Ավելին, դա ավելի ճիշտ կլինի, եթե այդ հարցը քննարկենք մեր գործընկերների՝ Հայաստանի խորհրդարանի պատգամավորների հետ»,- ասել է Վոլոդինը։
Գերատեսչությունների հետ քննարկումից հետո Վոլոդինն առաջարկել է շարունակել քննարկումը։ Նա հավելել է, որ դա լուրջ քայլ է, որն ընդգծում է երկրների հարաբերությունների մակարդակը։
«Ինչպիսի՞ն է Հայաստանի վարչապետի դիրքորոշումը։ Սրանք լուրջ որոշումներ են, մենք բացում ենք շուկան, բարելավում ենք ինքնաիրացման հնարավորությունները Հայաստանի քաղաքացիների համար, ովքեր այս օրենքի ընդունումից հետո, օգտվելով իրենց ազգային իրավունքներից, կկարողանան աշխատել Ռուսաստանի Դաշնության տարածքում»,- ասել է խոսնակը։
Ներկայումս տրանսպորտային միջոցներ վարելու թույլտվությունը գործում է Ղրղըզստանի եւ այն պետությունների քաղաքացիների համար, որտեղ ռուսաց լեզվի օգտագործումը հաստատված է որպես պաշտոնական:
