Փաշինյանին այլևս հաշվի չեն առնում. նախընտրում են բանակցել միայն Ադրբեջանի հետ

Ռուսական և արևմտյան փորձագիտական շրջանակները վերջին շրջանում տարօրինակ միտում են արձանագրել՝ կապված Հարավային Կովկասում իրավիճակի հետ։ Նախկինում երբ որևէ երկրի , հատկապես Ռուսաստանից բարձրաստիճան պաշտոնյա այցելում էր Հայաստան, անպայման մեկնում էր նաև Ադրբեջան, և հակառակը։

Այս կերպ, ըստ էության, այցին տրվում էր տարածաշրջանային բնույթ, պահպանվում էր անհրաժեշտ պարիտետը։ Մինչդեռ վերջին շրջանում այդ հավասարակշռումը պարզապես խախտվել է, թե՛ ռուսական, թե՛ արևմտյան բազմաթիվ պաշտոնյաներ միակողմանի այցեր են կատարում բացառապես Բաքու, իսկ Երևան այցեր չեն էլ նախատեսվում։

Ամենացայտունը ՌԴ ԱԳ նախարար Սերգեյ լավրովի վերջին երկու այցերն էին։ Լավրովը Երևան չժամանեց, իսկ տարածաշրջանային զարգացումների մասին իր ուշագրավ հայտարարություններն արեց Բաքվից։ Փաստացի այս կերպ հասկացնում են, որ խախտվել է ուժերի և հակակշռումների բալանսը, հակամարտության մեջ կա գերակա դիրք ունեցող, խաղի կանոները որոշող պետություն, իսկ Հայաստանի գործող վարչախումբը պարզապես դամ պահող է։

Ուստի, երբ իրադարձություններն ընթանում են Ադրբեջանի թելադրանքով և ցանկություններով, Հայաստանը ոչինչ չի որոշում, փոխարենը «խաղաղության դարաշրջանի» հասնելու ճանապարհին միտումնավոր հրաժարվում է դիմադրելու ռեսուրսներից, գերտերությունների ներկայացուցիչներն էլ հարկ չեն համարում հաշվի առնել ՀՀ շահերը։

Փոխարենը, փորձում են Ադրբեջանի և Թուրքիայի հետ համադրել իրենց շահերը, ի հաշիվ Հայաստանի դիվիդենտներ քաղել։ ՀՀ վարչապետի պաշտոնը զբաղեցնող անձը վաղուց այլևս գործոն չէ, ադրբեջանա-թուրքական խամաճիկ է, ուստի նրա վրա ժամանակ կորցնելու իմաստ չեն տեսնում։

Կարեն Լևոնյան