Հարցում. Վարդանյանը Լեռնային Ղարաբաղի Հանրապետությունում վստահության հաշվեկշռում առաջին տեղն է զբաղեցրել
ՎԵՐԼՈՒԾՈՒԹՅՈՒՆՆԵՐ
Rtvi.com-ը գրում է, որ չճանաչված Լեռնային Ղարաբաղի Հանրապետության (ԼՂՀ) բնակիչների ճնշող մեծամասնությունը իշխանությունների աշխատանքի առաջնահերթություն է համարում անվտանգության խնդիրները: Նման կարծիք է հայտնել Highgate Consult սոցիոլոգիական ընկերության կողմից անցկացված հարցման հարցվածների 87,8%-ը։ Մեծ տարբերությամբ առաջնահերթությունների ցանկը շարունակել են «արդարադատությունը» (38.2%), «օրենքի առջև համընդհանուր հավասարությունը» (37%) և «տնտեսական զարգացումը» (30.6%)։
Հանրապետական քաղաքական և հասարակական գործիչներից հարցվածներն ամենամեծ վստահությունն են հայտնել պետնախարար Ռուբեն Վարդանյանին: Նրա դեպքում մնացորդը (վստահության վարկանիշից հանած անվստահության վարկանիշը) կազմել է 42,6% և դեկտեմբերի համեմատ աճել 10,4%-ով։ Երկրորդ տեղը զբաղեցրել է ԼՂՀ նախկին արտգործնախարար Դավիթ Բաբայանը (36,2%), իսկ երրորդը ՀՀ նախկին նախագահ Ռոբերտ Քոչարյանը (28,4%)։ Վստահության բացասական սալդոնով 19-րդ տեղում է ԼՂՀ նախագահ Արայիկ Հարությունյանը (-22%), իսկ վարկանիշը եզրափակում է «Միասնական հայրենիք» կուսակցության նախագահ Սամվել Բաբայանը (-52,2%)։
Պատասխանելով գործող պետնախարարի վերաբերյալ հարցերին, հարցվածների 78%-ը դրական կամ շատ դրական է գնահատել Ռուբեն Վարդանյանի նշանակումը պետնախարարի պաշտոնում, բացասական 11,8%-ը։ Հարցվածները ճնշող հավանությամբ են արձագանքել նաև Վարդանյանի առաջին կադրային որոշմանը` 9 նախարարների հրաժարականին (70,6% դրական, 13,9% բացասական)։
Խոսելով ԼՂՀ-ի հեռանկարների մասին հարցվածների կեսից ավելին (58,8%) կողմ է արտահայտվել անկախության միջազգային ճանաչմանը, իսկ գրեթե 40%-ը ընտրել է Հայաստանի կամ Ռուսաստանի հետ դաշինքի տարբերակը։ Հարցման մասնակիցները որպես հանրապետության անվտանգության գլխավոր երաշխավոր նշել են սեփական պաշտպանության բանակը (95,4%), ռուսական խաղաղապահ զորախումբը (89,2%) և «հասարակությունը ամբողջությամբ» (82,3%)։
Ինչ վերաբերում է պետական կառավարման մոդելին, ապա հարցվածները հիմնականում կողմ են արտահայտվել «գործող նախագահական մոդելին»՝ հարցվածների 56,9%-ը։ Յուրաքանչյուր չորրորդն ընտրել է «կիսանախագահական» մոդել։
Ուսումնասիրությունն իրականացվել է 2022 թվականի դեկտեմբերի 10-25-ը և 2023 թվականի հունվարի 21-ից փետրվարի 2-ը Ստեփանակերտ, Ասկերան, Մարտունի, Մարտակերտ քաղաքներում 871 հարցվողի մասնակցությամբ անձնական հարցազրույցի մեթոդով։ Հարցումն իրականացրած Highgate Consultancy ընկերությունը գրանցված է Բելգիայում և ղեկավարում է սոցիոլոգ Հայկ Գյուզալյանը, ով նախկինում ղեկավարել է բելգիական Kantar Public սոցիոլոգիական ընկերության մեթոդական բաժինը։
Նյութը հրապարակման պատրաստեց Կամո Խաչիկյանը
