««Ռիսկի գործոն Հայաստանի համար». Փաշինյանի պահվածքը բացատրվում է Ղարաբաղի չլուծված խնդրով»
ՎԵՐԼՈՒԾՈՒԹՅՈՒՆՆԵՐ
360tv.ru-ն գրում է, որ Լեռնային Ղարաբաղի բնակիչների անվտանգությունն ապահովող ռուս խաղաղապահները չեն արձագանքել ադրբեջանական կողմի որոշ սադրիչ գործողություններին, ասել է Հայաստանի վարչապետ Նիկոլ Փաշինյանը։ Նա խոստովանել է, որ հանրապետությունը կարող է դիմել ՄԱԿ-ի Անվտանգության խորհրդին տարածաշրջան խաղաղապահ առաքելություն ուղարկելու համար։ Ավելի ուշ քաղաքական գործիչը ռուս-հայկական հարաբերություններն անվանել է ամենավստահելին վերջին ժամանակներում։
«360tv.ru»-ն պարզել է, թե ո՞րն է Հայաստանի վարչապետի դիրքորոշման հաճախակի փոփոխության պատճառը:
Հայաստանի վարչապետը մի շարք ամպագոռգոռ հայտարարություններ է արել Լեռնային Ղարաբաղի հետ կապված խնդիրների պատճառով, «360tv.ru»-ին ասել է Հետազոտական կենտրոնի տնօրեն, գրող Ստանիսլավ Տարասովը։ «Երբ ռուսական կողմը Հայաստանին և Ադրբեջանին առաջարկեց որոշել խաղաղապահների կազմը նրանք ինչ-ինչ պատճառներով հրաժարվեցին դա անել։ Եվ հիմա երկու կողմերն էլ տարբեր պատճառներով մեղադրում են ռուս խաղաղապահներին։ Հայաստանում անգամ հակառուսական ցույցեր են սկսվել»,- նշել է փորձագետը։
Տարասովի խոսքով Ղարաբաղում հակամարտությունը կարգավորելու հարցով Փաշինյանը դիմում է Արևմուտքին, սակայն ոչ մի արևմտյան երկիր, ներառյալ ԱՄՆ-ը և Ֆրանսիան, պատրաստ չէ փոխարինել ռուսական զորախմբին։ «Իսկ առանց ռուս խաղաղապահների հայկական անկլավը Լեռնային Ղարաբաղում կվերանա»,- ամփոփել է Ստանիսլավ Տարասովը։
Լեռնային Ղարաբաղը գտնվում է տնտեսական շրջափակման մեջ, ուստի Հայաստանը փորձում է լուծել խնդիրը, «360tv.ru»-ին ասել է քաղաքական վերլուծաբան Նիկիտա Դոնցովը։ Նա հավելել է, որ միևնույն ժամանակ Ադրբեջանը շարունակում է ճնշում գործադրել Հայաստանի իշխանությունների վրա, քանի որ չի ցանկանում հետաձգել իրավիճակի կարգավորումը։
«Կարծում եմ, որ Լեռնային Ղարաբաղի Հանրապետության տնտեսական շրջափակման հետ կապված իրավիճակը կարգավորելու և կայունացնելու համար Փաշինյանը բավականին սահմանափակ պայմաններում պատրաստ կլինի օգնություն խնդրել բոլորից։ Այլ հարց է այն, որ քիչ հավանական է, որ ՄԱԿ-ը էական օգնություն ցույց տա, և դա իսկապես ռիսկի գործոն է Հայաստանի համար»,- ասել է քաղաքագետը։ Փորձագետի կարծիքով Նիկոլ Փաշինյանը չի կարող ինքնուրույն լուծել ԼՂ-ի հետ կապված խնդիրը: Միաժամանակ նա հրաժարվել է Ռուսաստանի և ՀԱՊԿ-ի գործընկերների օգնությունից, Հայաստանի վարչապետի խոսքով, դա բավական որոշիչ չի լինի։ Ստեղծված իրավիճակում հանրապետությունը ստիպված է նոր դաշնակիցներ փնտրել, հավելել է «360tv.ru»-ի զրուցակիցը:
Նյութը հրապարակման պատրաստեց Կամո Խաչիկյանը
