Տարածաշրջանի երկրների, մասնավորապես Հայաստանի և Իրանի դեմ Ալիևի ագրեսիվ հայտարարությունների աճը «Սիոնիստական ռեժիմի» դիրքորոշման արտացոլումն է
ՎԵՐԼՈՒԾՈՒԹՅՈՒՆՆԵՐ
Infoteka24.ru–ն գրում է, որ Ադրբեջանի դեսպան Մուխթար Մամեդովին Իսրայել ուղարկելու որոշումը պետք է դիտարկել որպես «սիոնիստական ռեժիմի» գործողություն։ Նման կարծիքն է հայտնել իրանցի քաղաքական փորձագետ Բոհրան Հեշմատին ILNA գործակալությանը տված հարցազրույցում։
Մեկնաբանելով ադրբեջանա-իսրայելական հարաբերությունների ներկա մակարդակը՝ Հեշմատին ասել է, որ «Սիոնիստական ռեժիմն» իրեն այնպես է պահում, կարծես ինքն է որոշումներ կայացնում, իսկ Ադրբեջանի կառավարությունն ընդամենը կատարողն է, քանի որ Իսրայելի ազդեցությունն այդ երկրում վերջին երկու տարում, և հատկապես այն բանից հետո, ինչ եղավ 2020 թվականի պատերազմի արդյունքում հասել է շատ բարձր մակարդակի։
Պատասխանելով հարցին, թե ինչպե՞ս կազդեն Բաքու-Թել Ավիվ հարաբերությունները կովկասյան իրադարձությունների վրա, և արդյո՞ք Ադրբեջանի նախագահի կտրուկ հայտարարությունները կապված հայկական Սյունիքի և Զանգեզուրի միջանցքի հետ Իսրայելի աջակցությամբ են, փորձագետն ասել է. «Տարածաշրջանի երկրների, մասնավորապես Հայաստանի և Իրանի դեմ Ալիևի ագրեսիվ հայտարարությունների աճը հենց «Սիոնիստական ռեժիմի» դիրքորոշման արտացոլումն է, և այդ հակաիրանական և հակահայկական դիրքորոշումն ամբողջությամբ արտացոլված է Ալիևի և ադրբեջանական լրատվամիջոցների հայտարարություններում։ Ադրբեջանա-իսրայելական հարաբերությունների մակարդակի բարձրացումը միայն կկոշտացնի այդ դիրքորոշումը, և տարածաշրջանում կլինեն նոր սրացումներ»։
Նյութը հրապարակման պատրաստեց Կամո Խաչիկյանը
