Փաշինյանի սրտի նոր նախարարը

 Հայաստանի վարչապետի պաշտոնը զբաղեցնող Նիկոլ Փաշինյանը երեկ՝ կիրակի օրով, աշխատանքից ազատել է արդարադատության նախարարի առաջին տեղակալ, նախարարի պաշտոնակատար Գրիգոր Մինասյանին։

Ըստ ամենայնի, արդեն այսօր, Վահագն Խաչատրյանը Մինասյանին կնշանակի արդարադատության նախարարի պաշտոնում։ Տևական ժամանակ, գրեթե 2 ամիս, Հայաստանն արդարադատության նախարար չուներ, և պարտականությունները կատարում էր Գրիգոր Մինասյանը։ Նախկինում մի քանի անգամ նշել ենք, որ Նիկոլ Փաշինյանն ամենայն հավանականության մտածում է հենց Մինասյանին էլ այդ պաշտոնին նշանակելու համար։ Սակայն նրան փորձաշրջան է տվել, պարզելու արդյոք Մինասյանը կկարողանա իրականացնել իր բոլոր ոչ այնքան օրինական հանձնարարությունները, թե՝ ոչ։

Ըստ երևույթին Փաշինյանը գոհ է մնացել Մինասյանի աշխատանքից, նախօրեին նա գնացել էր արդարադատության նախարարություն անձամբ հետևելու նախարարության աշխատանքի ամփոփմանը, որտեղ էլ Մինասյանն ու իր տեղակալները ներկայացրել են կատարված աշխատանքները։

Մեր աղբյուրի փոխանցմամբ՝ Փաշինյանը չափազանց գոհ է եղել Մինասյանից և որոշել է հենց նրան էլ նշանակել։ Մինասյանի նշանակմամբ Փաշինյանը մի քանի կարևոր հարց է լուծում. առաջին հերթին ցույց է տալիս, թե իբր նախկինների «լավագույն կադրերին» շարունակում է տեղ տալ և պահել իր մոտ։ Հիշեցնենք, Գրիգոր Մինասյանը Սերժ Սարգսյանի փեսայի՝ Միքայել Մինասյանի եղբայրն է, Միքայել Մինասյանը հետախուզման մեջ է Հայաստանում, նախօրեին էլ մեկ այլ քրեական գործ հարուցվեց Գրիգոր Մինասյանի հոր՝ Սուրբ Գրիգոր Լուսավորիչ ԲԿ-ի տնօրեն Արա Մինասյանի նկատմամբ։

Եվս երեք դրվագներով նախկինում Արա Մինասյանին մեղադրում էին բյուջեից գրեթե մեկ միլիոն դոլար հափշտակելու մեջ, այժմ էլ 415 միլիոն դոլարի հափշտակության մեղադրանք է առաջադրվել։ Մի կողմից Փաշինյանը հետապնդում է այլևս նախկին փոխնախարարի ընտանիքի անդամներին, մյուս կողմից նրան պաշտոնի բարձրացում է տալիս, այս կերպ ոչ միայն սեպ խրելով այդ ընտանիքի մեջ, (եթե իհարկե այդ սեպը վաղուց չէր խրված), նաև՝ խրախուսելով ամենաստորակարգ բնազդները, փորձում է իր կողմը քաշել բոլոր նախկիններին։ Գրիգոր Մինասյանը, հիշեցնենք, ՀՀԿ ցուցակով ժամանակին Երևանի ավագանու անդամ է եղել։

Աննա Նադոյան