Հայաստանում պատմել են ռուսաց լեզվի լայն տարածման մասին
ՎԵՐԼՈՒԾՈՒԹՅՈՒՆՆԵՐ
Russkiymir.ru–ն գրում է, որ Հայաստանի բնակիչների 80 տոկոսը խոսում է ռուսերեն։ Այն դասավանդվում է հանրապետության մի քանի տասնյակ դպրոցներում, տպագրվում են թերթեր ու գրքեր, ռուսերեն խոսում են փողոցներում։ Հայաստանում աշխատող ռուսները և ռուսական դպրոցների ուսուցիչները նշել են, որ Ռուսաստանի հետ սերտ կապերը, ռուս գրականության նկատմամբ հայերի սերը և երկու երկրների ընդհանուր պատմությունը ազդել են հանրապետությունում ռուսաց լեզվի լայն տարածման վրա։ Այդ մասին հայտնել է Ռուսական աշխարհագրական ընկերակցությունը:
Ներկայումս Հայաստանում գործում է ռուսաց լեզվի խորացված ուսումնասիրությամբ ավելի քան վաթսուն դպրոց, քառասուներեք ուսումնական հաստատություններում բացվել են ռուսերենի դասարաններ, որոնցում ուսումնական գործընթացն իրականացվում է ռուսերենի դասագրքերով և ծրագրերով։ Ընդ որում դպրոցականները սկսում են ռուսերեն սովորել երկրորդ դասարանից, նրանցից շատերը կրքոտ են սովորում, որպեսզի ընդունվեն ռուսական բուհեր։
Հայաստանում աշխատող ռուսներն ասում են, որ ռուսախոսները դժվարություններ չունեն տեղի բնակչության հետ շփվելու հարցում, հայերը մեծամասամբ կարողանում են ռուսերեն խոսել։ Հայաստանի դպրոցներից մեկի ռուսական հատվածի համակարգող Արմենա Աբրահամյանը պատմել է այն մասին, որ ինքը ռուսական արմատներ չունի, բայց մանկուց կարդում և մտածում է ռուսերեն։ Նրա խոսքով ռուսաց լեզուն և գրականությունը «ձևավորում են հոգին» և հոբբիները։
Նույն դպրոցի աշխարհագրության ուսուցչուհի Նինել Գասպարյանն էլ պատմել է, որ իր ընտանիքում միշտ ռուսերեն է խոսել, և հիմա որդին ազատ տիրապետում է ռուսերենին: Ռուս-հայկական համալսարանի Արևելագիտության ինստիտուտի պրոֆեսոր Վիկտորյա Առաքելովան էլ ասել է, որ Հայաստանին հաջողվել է պահպանել «ռուսական քաղաքակրթությունը», մինչդեռ որոշ հարևան երկրներում այն դուրս է մղվել։
Նյութը հրապարակման պատրաստեց Կամո Խաչիկյանը
